Sapasyz uıaly baılanys qyzmetin kórsetetin operatorlarǵa aıyppul salý usynyldy

ASTANA. QazAqparat - QR Investıtsııalar jáne damý mınıstrligi baılanys sapasy úshin uıaly jeliniń operatorlaryna aıyppul salýdy usyndy.

Bul týraly búgin Astanadaǵy Májilistegi «Nur Otan» partııasy fraktsııasy janyndaǵy Ekonomıkalyq saıasat keńesiniń, partııanyń Saılaýaldy tuǵyrnamasynyń «Innovatsııalyq» ekonomıka baǵyty boıynsha saraptamalyq toptyń birlesken otyrysynda málim boldy.

«Biz uıaly baılanystyń sapasy boıynsha jumys isteýdemiz. Biz uıaly baılanys sapasyn tekserýge múmkindik beretin arnaıy jabdyqtalǵan avtokólikti kórsettik. Atap aıtqanda, bizge uıaly baılanys operatorlaryna tıisti sharalardy qoldanýǵa múmkindik beretin zańnamalyq normalar jetispeıdi»,- dedi QR Investıtsııalar jáne damý vıtse-mınıstri Asqar Jumaǵalıev.

Osy oraıda ol búginde Májilistiń qaraýynda baılanys sapasyn qadaǵalaýǵa negizdelgen usynystar qamtylǵan zań jobasy engizilgenin atap ótti.

«Bizdiń usynysymyz sizderdiń taraptaryńyzdan qoldaýǵa ıe bolady dep úmittenemin. Bul turǵyda sapasyz uıaly baılanys úshin aıyppul sanktsııalary qarastyrylǵan. Budan ári qaraı baılanys sapasyn arttyryp, damytý úshin tehnıkalyq qamtamasyz etýmen qatar osyndaı tetikti usynyp otyrmyz»,- dep túıdi A.Jumaǵalıev.