Sapasyz taýar satyp alǵan qazaqstandyqtarǵa bir aptada 12 mln teńge qarajat qaıtarylǵan

ASTANA. QazAqparat – 5 kún ishinde quqyǵy buzylǵan qazaqstandyqtarǵa 12 mln teńgeden astam qarajat qaıtaryldy. Bul týraly Saýda jáne ıntegratsııa mınıstrligi Tutynýshylardyń quqyqtaryn qorǵaý komıtetiniń baspasóz qyzmetinen málim etti, dep habarlaıdy QazAqparat tilshisi.

Komıtet dereginshe, 14-18 qarasha aralyǵynda taýar satyp alý kezinde quqyǵy buzylǵan el turǵyndary tarapynan 590 ótinish túsken.

«329 jaǵdaıda ótinish berýshilerge quqyqtyq kómek kórsetildi. 287 ótinish qanaǵattandyryldy, al 75 ótinish quzyretine saı keletin organdarǵa joldandy. Bir apta ishinde tutynýshylarǵa 12,2 mln teńge qaıtaryldy», - delingen komıtet habarlamasynda.

Vedomstvo dereginshe, bir apta ishinde qaıtarylǵan úlken soma – 4,4 mln teńge. Onda Aqmola men Aqtóbe oblystarynyń 5 turǵyny eki jaýapkershiligi shekteýli seriktestikten massaj qurylǵylaryn satyp alǵan. Keıin olardyń sapasyz ekenin kórip, qaıtarmaq bolǵan. Degenmen ony satqan seriktestikter taýardy qaıta qabyldaýdan bas tartypty. Artynsha turǵyndar Tutynýshylardyń quqyqtaryn qorǵaý departamentterine júginip, jalpy somasy 4,4 mln teńgesin qaıtaryp alǵan.

Sonymen qatar, aqaýy bar tehnıka satyp alǵan Qostanaı, Túrkistan jáne Pavlodar oblystarynyń turǵyndaryna jalpy somasy 1,5 mln teńge qaıtarylǵan.

Komıtet usynǵan derekke sáıkes, budan ózge taǵy 3 óńirde sapasyz úı jıhazyn satyp alǵan azamattar jergiliktti departtamentterdiń kómegimen aqshalaryn qaıtaryp alǵan. Olarǵa ótelgen soma - 1,2 mln teńge.