Sapasyz memlekettik qyzmet kórsetken 305 laýazymdy tulǵa jaýapqa tartyldy

ASTANA. QazAqparat – Ótken jyly memlekettik qyzmetter kórsetý salasynda 46 myńǵa jýyq zań buzýshylyq anyqtalǵan. Tolyǵyraq Memlekettik qyzmet isteri agenttigi tóraǵasynyń orynbasary Salaýat Múksimov aıtyp berdi, dep habarlaıdy QazAqparat tilshisi.

«Memlekettik qyzmet kórsetý sapasyn baqylaýdy qamtamasyz etý maqsatynda 756 tekseris júrgizildi. Nátıjesinde 46 myńǵa jýyq zań buzýshylyq anyqtaldy. Tekserý qorytyndysy boıynsha 602 memlekettik qyzmet kórsetýshi tártiptik jaýapkershilikke jáne 305 laýazymdy tulǵa ákimshilik jaýapkershilikke tartyldy», - dedi Salaýat Múksimov Ortalyq kommýnıkatsııalar qyzmeti alańynda ótken baspasóz máslıhatynda.

Spıkerdiń málimdeýinshe, quzyrly organdarǵa memlekettik qyzmet kórsetý sapasyn arttyrýǵa baǵyttalǵan 1 myńnan astam usynys joldandy. Sonymen qatar, Tsıfrlyq damý mınıstrligi anyqtalǵan kemshilikterdi joıý jónindegi keshendi jospardy bekitti.

«Memlekettik qyzmetterdi proaktıvti túrde usyný jáne klıenttiń qyzmet alý quqyǵyn qalpyna keltirýge erekshe nazar aýdarylady. Sonymen qatar, monıtorıng nátıjesinde qyzmet kórsetýden negizsiz bas tartý jáne onyń sebepterin tolyq kórsetpeý faktileri anyqtaldy. Osylaısha, 124 memlekettik qyzmet alýshynyń quqyqtary qalpyna keltirildi», - deıdi agenttik basshysynyń orynbasary.

Buǵan deıin S. Múksimov agenttik atynan HQO-da tehnıkalyq aqaý týyndaǵanda azamattardy kúttirip qoımaýdyń jolyn qarastyrýdy usyndy.

Sondaı-aq, memlekettik qyzmet alýda aıyppuldyń kedergi bolmaýy kerektigi aıtyldy.