Sapasyz ınternet úshin baılanys operatorlary 92 mln teńge aıyppul tóledi

NUR-SULTAN. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aýyldardy ınternetpen qamtý jumystaryn aıtyp berdi, dep habarlaıdy QazAqparat.

«Qazir barlyq aýylǵa ınternet jetkizý máselesi ashyq tur. Ázirge 5 163 aýyldyq eldi meken men qalalarda ınternet bar deımiz, biraq 768 aýylda ınternet sapasy tómen. Buryn nege ınternet sapasy jónindegi suraqtarǵa jaýap bere almadyq? Óıtkeni, jalpy eń tómengi deńgeıdegi parametrler belgilenbegen edi. Men osy jyldyń basynda óz buıryǵymmen eń tómengi parametrlerdi belgiledim, ol 3G úshin – 1,5 megabıt, 4G úshin – 5 megabıt boldy. Buryn tekserý júrgizgende 3G bolsa, ınternet bar dep esepteletin. Al qazir osy parametrlerge saı kele me, osyny baqylaımyz», - dedi mınıstr Ortalyq kommýnıkatsııalar qyzmetinde ótken baspasóz máslıhatynda.

Vedomstvo basshysynyń aıtýynsha, jyl basynan beri ınternet sapasyna 400-den astam tekserý jumystary júrgizilgen jáne olardyń 80 paıyzynda sapa atalǵan parametrlerge saı kelmeıtini anyqtalǵan.

«2020, 2019 jyldary mundaı tekserýler sany júzge de jetpeıtin. Osylaısha, biz tekserý jumystaryn kóbeıtip, ınternettiń tıisti sapasyn qamtamasyz etpegen operatorlarǵa aıyppuldar berdik. Osy 3-4 aıdyń ishinde operatorlar bul máseleni sheshpese, aıyppuldar kólemi eki ese ulǵaıady. Qazir depýtattarmen birlesip, aıyppuldar kólemin 100 AEK-ten 1000 AEK-ke (2 917 000) deıin ósirip jatyrmyz. Bıyl 92 mln teńge aıyppul bersek, 10 ese ósken aıyppul bir jylda 1-2 mlrd teńge somasynda jınalady dep oılaımyz. Árıne, bul óte qomaqty soma. Sondyqtan, operatorlar ınternet sapasyn arttyrýǵa bar kúsh-jigerin salady dep úmittenemin», - dedi B. Mýsın.

Sonymen birge, mınıstr ınternet sapasyn arttyrý maqsatynda radıojıilikter beriletinin atap ótti.

«Aýyl sharýashylyǵyna jer qandaı kerek bolsa, baılanys operatorlary úshin de radıojıilik kerek. Ony kózben kóre almaımyz, biraq ınternet radıojıilikter arqyly jumys isteıdi. Ony bizdiń mınıstrlik taratady. Bıyl radıojıilik lıtsenzııalaryn qaıta jınap, jańasyn taǵaıyndadyq. Aldaǵy eki jylda atalǵan 768 aýylda ınternet sapasy jaqsartylady. Ekinshiden ulttyq joba aıasynda eń tómengi parametrlerdi 4 jylda 10 megabıtke deıin kóteremiz. Oblys ortalyqtary men qalalarda 5G baılanysyn ótkizetin bolamyz», - dep tolyqtyrdy B. Mýsın.