Sapasyz avtomektepterdiń jaýapkershiligi qaralýy qajet - Premer-Mınıstr

ASTANA. QazAqparat – Eldegi avtomektepterdiń jumys sapasy kúmándi, jetildirilýi kerek tustary bar. Premer-Mınıstr Álıhan Smaıylov jol apattaryna qatysty osy jáne basqa da máseleler tóńireginde ákimdikter men tıisti sala basshylaryna tapsyrmalar berdi, dep habarlaıdy QazAqparat tilshisi.

«Júrgizýshilerdi daıarlaý sapasy kúmán týdyrady. Birinshi kezekte avtomektepter jumysyndaǵy tásilderdi ózgertý qajet. Búginde olardy baqylap jatqan eshkim joq, lıtsenzııa berilmeıdi. Kólik júrgizýge arnalǵan avtodromdar jetkiliksiz. Ákimdikter bul máseleni bıznespen birge qaraýy tıis», - dedi Á. Smaıylov Úkimettiń búgingi otyrysynda.

Sondaı-aq, Premer-Mınıstr mektepterde balalarǵa jol júrý erejesi oqytylmaıtynyn, avtokólikterdi tehnıkalyq tekserý sapasyna qatysty da suraqtar kóp ekenin atap ótti. Sonymen birge, kólik apattarynyń negizgi sebepteri – joldardyń nasharlyǵy ekenine toqtaldy.

«Halyq tarapynan joldyń sapasyna qatysty shaǵym óte kóp. 26 qyrkúıekte Aqtóbede turǵyndar aınalma joldy jaýyp tastady. Sebebi, ol jolda ne jaryq joq, ne jaıaý júrginshi ótetin jer, ne qaýipsizdik elementteri joq. Munyń bári jol apatyna alyp keledi. Jol qaýipsizdigi salasynda beınekameralar men basqa da tehnıkalyq baqylaý quraldary jetkiliksiz. Respýblıkalyq mańyzy bar avtojoldarda beınebaqylaý júıesi tek Aqmola oblysynda ǵana bar. Bizdiń basty mindetimiz – jol qaýipsizdigi, jol apattary men odan qaza bolý jaǵdaılaryn azaıtý boıynsha keshendi sheshimder qabyldaý», - dedi Premer-Mınıstr.

Úkimet basshysy Іshki ister mınıstrligine múddeli memlekettik organdarmen jáne ákimdiktermen birlesip, jol apattarynyń kóbeıýine qatysty jan-jaqty taldaý júrgizýdi tapsyrdy.

«Jol apattary jıi bolatyn ýchaskelerdegi qozǵalysty qadaǵalaý jumystaryn kúsheıtý qajet. Tıisti is-sharalardy ázirlep, ony daıyndalyp jatqan Qoǵamdyq qaýipsizdikti qamtamasyz etý jónindegi tujyrymdamaǵa engizý kerek.

Ákimdikter qaýipsiz jol ınfraqurylymyn jasaý boıynsha qosymsha sharalar qabyldasyn. Joldaǵy kameralardy kóbeıtý qajet.

Indýstrııa mınıstrligi kólikti tehnıkalyq tekserý sapasyn tıimdi baqylaý tetigin jasasyn. Eń bastysy – joldardyń jaı-kúıin baqylaýdy kúsheıtý boıynsha shara qabyldaý.

Ádilet jáne Іshki ister mınıstrlikteri sapasyz júrgizýshilerdi daıarlaıtyn avtomektepterdiń jaýapkershiligi máselesin qarastyrsyn. Jol júrý erejelerin jıi buzatyn adamdarǵa jazany kúsheıtý qajet.

Іshki ister, Oqý-aǵartý, Aqparat mınıstrlikteri men ákimdikterge jol qaýipsizdigin saqtaý boıynsha aqparattyq-túsindirý jumysyn uıymdastyrýdy tapsyramyn», - dedi Álıhan Smaıylov.

Buǵan deıin habarlaǵanymyzdaı, Qazaqstanda jol apattarynyń sany 14%-ke, qaza tapqandar sany 18%-ke kóbeıdi.

Foto: primeminister.kz