Saparhan Omarov sheteldikterge jalǵa berilgen jer alqaby týraly aıtty

NUR-SULTAN. QazAqparat – Senattyń jalpy otyrysynda «Qazaqstan Respýblıkasynyń keıbir zańnamalyq aktilerine jer qatynastary máseleleri boıynsha ózgerister men tolyqtyrýlar engizý týraly» zań jobasy birinshi oqylymda talqylandy. Jıyn barysynda Aýyl sharýashylyǵy mınıstri Saparhan Omarov qazirgi kezde sheteldikterge jalǵa berilgen alqap týraly aıtty, dep habarlaıdy QazAqparat tilshisi.

«Qazirgi ýaqytta jalpy aýdany 74,4 myń gektar aýyl sharýashylyǵy maqsatyndaǵy jerdi sheteldik qatysýy bar jeti zańdy tulǵa jalǵa alyp otyr. Onyń ishinde Jambyl oblysynda aýyl sharýashylyǵyna arnalǵan aýdany 5,9 myń gektardy 1 kásiporyn, Pavlodar oblysynda aýdany 32,2 myń gektar aýyl sharýashylyǵyna paıdalanylatyn jeri bar 1 kásiporyn, Atyraý oblysynda 1,6 myń gektar jer 1 kásiporynda jáne Aqmola oblysynda jalpy alańy 34,7 myń gektardy quraıtyn aýyl sharýashylyǵy maqsatyndaǵy 4 kásiporyn bar», - dedi S. Omarov.

Sonymen qatar mınıstr eki sheteldik kompanııa jumys isteıtinin, bul Shyǵys Qazaqstan oblysynda 14,9 myń gektar alqapta 1 kásiporyn jáne Jambyl oblysynda 3,6 myń gektar alqapta 1 kásiporyn bar ekenin aıtty.

Osy oraıda ol bul jerlerdiń barlyǵy memleketke qaıtarylatynyn naqtylady.

«Osy kompanııalar bul jerlerdi moratorıı engizilgenge deıin jalǵa alǵan. Bul rette osy sheteldik kompanııalardyń aýyl sharýashylyǵy jerleriniń jaldaý merzimderi 2022 jyldan bastap 2025 jylǵa deıingi kezeńde aıaqtalady. Tıisinshe, jalǵa alý merzimi aıaqtalǵannan keıin jańa merzimge uzartylmaıdy, óıtkeni búgingi kúni talqylanǵan zań jobasy sheteldik jer paıdalanýshylarǵa jáne ártúrli birlesken kásiporyndarǵa jer berýge tolyq tyıym salýdy qarastyrady», - dedi Saparhan Omarov.