Saparhan Omarov bıylǵy egin túsimine boljam jasady
«Oblys ákimdikteriniń jedel aqparaty boıynsha, egis alańdary 237,7 myń gektarǵa artyp, 22,5 mln gektardy qurady. Máselen, azyqtyq daqyldarǵa arnalǵan alańdar - 312,1 myń gektarǵa, maıly daqyl alańdary - 184,7 myń gektarǵa, baqsha daqyldaryna arnalǵan alańdar - 7,4 myń gektarǵa, kókónis alańdary - 3,9 myń gektarǵa, kartop alańdary - 2,5 myń gektarǵa ulǵaıdy», - dedi Saparhan Omarov Úkimet otyrysynda.
Mınıstrdiń aıtýynsha, sapaly jáne ýaqtyly júrgizilgen ylǵaldy saqtaý sharalary jáne egis aldynda júrgizilgen topyraqty óńdeý - aramshópti barynsha joıyp, topyraqtyń ylǵalyn saqtaýǵa yqpal etken. Egis jumystary ońtaıly merzimde júzege asyrylyp, nátıjesinde egin birkelki jáne tolyq shyqqan.
«Fermerler der kezinde arzan janar-jaǵar maımen, sapaly tuqymmen, tyńaıtqyshpen, tehnıkamen qamtamasyz etildi. Kelesi mańyzdy is-shara - egisti fıtosanıtarııalyq qorǵaý. Ósimdikterdi qorǵaý quraldaryn satyp alýǵa yntalandyrý úshin bıyl 37 mlrd teńge kózdelgen. Bul 16,6 mln lıtr pestıtsıdti sýbsıdııalaýǵa múmkindik beredi», - dedi ol.
Qazgıdromettiń boljamyna sáıkes, maýsym aıynda aýanyń ortasha temperatýrasy Soltústik Qazaqstan oblysynda, Qostanaı, Aqmola, Pavlodar oblystarynyń soltústik jaǵynda normada bolady. Al Aqmola oblysynyń orta jáne ońtústik bólikterinde, Qaraǵandy, Shyǵys Qazaqstan oblystarynyń kóp jerinde, sondaı-aq Pavlodar jáne Qostanaı oblystarynyń ońtústiginde normadan 1°S joǵary bolmaq.
«Joǵaryda kórsetilgen oblystarda jaýyn-shashyn mólsheri normada bolady. Qaraǵandy oblysynda ǵana normadan tómen bolady dep boljanýda. Bul faktorlardyń barlyǵy qolaıly aýa raıy jaǵdaıynda jáne egin jınaý jumystaryn ońtaıly merzimderde júrgizgen jaǵdaıda jaqsy túsim alýdy boljaýǵa múmkindik beredi», - dedi ol.