Saparhan Omarov azyq-túlik baǵasyn ustap turý úshin atqarylatyn sharalardy atady

NUR-SULTAN. QazAqparat – Aýyl sharýashylyǵy mınıstri Saparhan Omarov elde azyq-túlik baǵasyn ustap turý baǵytynda qandaı sharalar qolǵa alynatynyn aıtyp berdi, dep habarlaıdy QazAqparat tilshisi.

«Áleýmettik mańyzy bar azyq-túlik taýarlaryna baǵanyń ósýin boldyrmaý maqsatynda Aýyl sharýashylyǵy mınıstrligi ishki naryqty molyqtyrý boıynsha josparly jumys júrgizýde. Import almastyrýdy eskere otyryp, ınvestıtsııalyq jobalardy iske asyrý jóninde aıqyn jospar ázirlendi», - dedi Saparhan Omarov Úkimet otyrysynda.

Mınıstrdiń aıtýynsha, saqtaý ınfraqurylymy boıynsha qazir respýblıkada 27 mln tonna saqtaý syıymdylyqtary bar nysandar, onyń ishinde 189 lıtsenzııalanǵan astyq qabyldaý kásiporny bar.

«Alaıda shaǵyn jáne orta fermerlerge arnalǵan 10 myń tonnaǵa deıingi kishigirim astyq qoımalarynyń máselesin sheshý kerek. Mundaı tájirıbe AQSh pen Kanadada bar, biz de bul baǵytta memlekettik qoldaý sharalaryn engizýdi josparlap otyrmyz. Sonymen qatar, maýsymaralyq kezeńde qazirgi zamanǵy kókónis saqtaý oryndary men jemis saqtaý oryndary jetispeıdi. Bul úshin zamanaýı saqtaý oryndaryn salýǵa jeńildetilgen kredıt berý jáne ınvestıtsııalyq sýbsıdııalaý júzege asyrylýda», - dedi ol.