Saparbaev jylý júıelerin jóndeý jumystarynyń baıaý júrgizilip jatqanyn synǵa aldy

TARAZ. QazAqparat -Jambyl oblysynyń ákimi Berdibek Saparbaev oblys ortalyǵyn aralap, ystyq sýǵa qatysty buǵan deıin berilgen tapsyrmalardyń oryndalýyn tekserdi, dep habarlaıdy QazAqparat óńir basshysynyń resmı saıtyna silteme jasap.

Berdibek Saparbaev Q.Turysov, T.Rysqulov jáne ál-Farabı kóshelerindegi, Koıgeldi kóshesinen Sátbaev kóshesine deıingi jylý jelilerin jóndeý jumystarymen tanysty. Jelilerdiń uzyndyǵy 866 metrdi quraıdy. Merdiger - «Agrospetsstroı» JShS. Mamyr aıynda jumys bastalǵan jumys kelisim boıynsha qazan aıynda aıaqtalýy kerek.

Jýyrda ǵana ótken turǵyn úı-kommýnaldyq sharýashylyq máseleleri jónindegi keńeste Berdibek Saparbaev shuǵyl túrde ystyq sýmen qamtamasyz etýdi qalpyna keltirýdiń sheshimin tabýdy, sonymen qatar, jylý júıelerin jóndeýdi tezdetýdi tapsyrǵan bolatyn. Óńir basshysy merdigerlerdi jumystyń baıaý júrgizilgendigi úshin synǵa aldy.

Jumys sapary barysynda oblys ákimi kompanııanyń atalǵan eskertýlerdi elemegenine kóz jetkizdi. Qurylys alańdarynda bir aýysymda 18-20 qurylysshy ǵana jumys isteýde.

- Tek bir aýysym jumys isteıdi. Jumysshylar kesh keledi, erte ketedi. Árıne, mundaı qarqynmen jóndeý sharalary uzaqqa sozylady. Merdigerlerdiń júıesiz jumysynyń saldarynan turǵyndar birneshe aı boıy ystyq sýsyz otyrýǵa májbúr, - dedi oblys ákimi.

Ol qurylys jumystarynyń qarqynyn arttyrýdy tapsyrdy jáne salynyp jatqan ınfraqurylymnyń sapasyna nazar aýdarý kerektigin basa aıtty.

- Taǵy eki aýysymdy qosý kerek. Qurylysshylar kúndiz-túni jumys isteýi kerek. Bul úshin olardyń jalaqysyn kóbeıtken durys. Nátıjesinde nysandar ýaqyt sozbaı paıdalanýǵa beriletin bolady. Osylaısha, jedel jumystardyń arqasynda ystyq sý berý de qalpyna keltiriledi, - dedi Berdibek Saparbaev.

Merdiger ókili kemshilikterdiń túzetiletindigine sendirdi.

Sondaı-aq, Berdibek Saparbaev birneshe dárihanalarǵa at basyn burdy. Bir apta buryn dárihana jelileri ókilderimen jáne medıtsınalyq ónimderdi jetkizýshilermen kezdesýde ol oblys turǵyndaryn qajetti dári-dármektermen qamtamasyz etýdi, tapshy dárilerdiń analogtary týraly usynýdy tapsyrǵan bolatyn.
«Ámir ı D» JShS dırektorynyń orynbasary Ámir Nurseıitovtyń aıtýynsha, dári-dármekter kún saıyn jetkiziledi, biraq tez ótip ketýde. Sondyqtan kompanııa qazir kóp suranysqa ıe preparattardyń tórt túrin shyǵara bastaǵan.

Berdibek Saparbaev jergilikti kompanııalar shyǵaratyn dári-dármekterdiń sanyn arttyrýdy tapsyrdy.

Densaýlyq saqtaý basqarmasynyń basshysy Marat Jumanqulovqa «SK-Farmatsııa» JShS-men tyǵyz qarym-qatynas jasap, medıtsınalyq mekemelerdiń der kezinde dári-dármektermen qamtylýyn baqylaýdy tapsyryldy.

Qalany aralaý barysynda Berdibek Saparbaev oblystyq kópsalaly aýrýhanasyndaǵy jaǵdaımen de tanysty.

Bas dáriger Abaı Nurjanovtyń aıtýynsha, tósek-oryn men dári-dármekter jetkilikti. Naýqastardyń týystary úshin aýrýhananyń kireberisinde olardyń aǵymdaǵy jaǵdaıy týraly patsıentterdiń tizimi ilýli turady. Sonymen qatar, kezekshi dáriger árdaıym týystaryn tyńdaýǵa jáne olardyń barlyq suraqtaryna jaýap berýge daıyn.

- Naýqastardyń týystaryna ońaı emes, olarǵa da jyly sóz, naqty aqparat kerek. Dárigerler olarmen únemi baılanysta bolýy tıis. Naýqastardyń qabyldaý bóliminde uzaq ýaqyt kútip qalmaýyn, birden palataǵa jatýyn qadaǵalaý kerek. Olar úshin barlyq jaǵdaıdy jasaý mańyzdy. - dep atap ótti oblys ákimi.

Aýrýhanaǵa túsken naýqastardyń týystaryn áńgimege tartqan Berdibek Saparbaev olardy úreılenbeýge, dárigerlerge senýge shaqyrdy.