Saparbaev tótenshe jaǵdaı saldaryn joıý jónindegi shtab otyrysyn ótkizdi
Oblystyq shtabtyń málimetteri boıynsha, aýdanda bolǵan oqıǵalar barysynda 185 azamat zardap shekti. Olardyń 34-i aýrýhanaǵa jatqyzylǵan. Sondaı-aq, 39 turǵyn úı, 20 kommertsııalyq nysan jáne 47 avtokólik órtengen.
Bıylǵy 7-13 aqpan aralyǵynda Qordaı, Qarasý, Aýqatty, Sortóbe baqylaý-ótkizý beketteri arqyly Qyrǵyz Respýblıkasyna barlyǵy 23 131 adam ótip, 21 261 adam kirgen.
Aýyldardy tazalaý jumystaryna 250 adam jáne 53 birlik tehnıka jumyldyrylyp, barlyǵy 680 tonna qurylystyq qoqys shyǵaryldy.
Qazirgi ýaqytta 55 dúken, 3 dárihana, 14 janarmaı quıý beketteri jáne 30 basqa da kommertsııalyq nysan turaqty jumys jasaýda.
Joǵalǵan qujattardy qalpyna keltirý úshin Sortóbe aýyldyq okrýgi ákimdiginiń ǵımaratynda mobıldi Halyqqa qyzmet kórsetý ortalyǵy quryldy. Ol ortalyq arqyly búginge deıin týý týraly 54 kýálik, 48 jeke kýálik, balalarǵa arnalǵan 1193 anyqtamalyq qaǵaz, jyljymaıtyn múlik týraly 15 qujat, neke týraly 8 kýálik, 1 pasport berilgen.
Sonymen qatar, 778 zardap shegýshi otbasyǵa barlyǵy 57,2 tonna alǵashqy qajettiliktegi zattar men azyq-túlikterden quralǵan gýmanıtarlyq kómek kórsetildi.
Múlki zardap shekken azamattarǵa jalpy 3,9 mıllıon teńgeniń aqshalaı kómegi úlestirilgen.
Búgingi tańda aýdanda turaqty jaǵdaı saqtalýda, quqyqtyq tártipti qamtamasyz etý boıynsha tıisti jumystar jalǵasýda.
Otyrys qorytyndysy boıynsha oblys ákimi Berdibek Saparbaev turǵyndardyń qaýipsizdigin qamtamasyz etý, zardap shekken nysandardy, múlikti, qujattardy qalpyna keltirý jáne eldi mekenderdegi qalypty tirshilik jaǵdaıyn qamtamasyz etý boıynsha birqatar tapsyrmalar berdi.
Buǵan deıin habarlaǵanymyzdaı, B.Saparbaev Jambyl oblysynyń ákimi retindegi alǵashqy jumys saparyn Qordaı aýdanyna jasady.