Saparbaev: medıtsınalyq saqtandyrý durys jumys isteý úshin memorgandar birigýi tıis

NUR-SULTAN. QazAqparat - QR Premer-Mınıstriniń orynbasary Berdibek Saparbaevtyń tóraǵalyǵymen medıtsınalyq saqtandyrýdy engizý máseleleri boıynsha keńes ótti, dep habarlaıdy QR DSM baspasóz qyzmeti.

Buǵan deıin Qazaqstan Prezıdenti Qasym-Jomart Toqaev Úkimetke áleýmettik medıtsınalyq saqtandyrýdy júzege asyrý máselesine jaýapkershilikpen qaraýdy tapsyrǵan bolatyn.

Eljan Birtanov Densaýlyq saqtaý júıesin medıtsınalyq qyzmetti medıtsınalyq saqtandyrý boıynsha kórsetýge daıyndaý týraly baıandady.

Qazir daıyndyq jumystary bes negizgi baǵyt boıynsha júrgizilýde: quqyqtyq bazany qalyptastyrý, Densaýlyq saqtaý mınıstrliginiń aqparattyq júıelerin jaqsartý, qorǵa aýdarylǵan aqshaǵa monıtorıng júrgizý jáne saqtandyrylǵan adamdardy esepteý, aqparattyq-túsindirý jumystary, Qaraǵandy oblysynda medıtsınalyq saqtandyrýdyń pılottyq jobasyn engizý.

1 qyrkúıekten bastap engizilgen medıtsınalyq saqtandyrýdy testileý aldyn ala máselelerdi anyqtaýǵa jáne MÁMS-ke tolyq kóshý kezinde táýekelderdi joıýǵa kómektesedi.

Eljan Birtanov ózge de memlekettik organdarmen birlesip sheshýdi talap etetin birneshe máseleni atady.

«Medıtsınalyq saqtandyrý tabysty jumys isteý úshin halyqty barynsha kóbirek tartý kerek. Medıtsınalyq saqtandyrý qory saqtandyrylǵan adamdardyń sanyn turaqty túrde eseptep, monıtorıng júrgizedi.

Búgingi tańda, bizdiń baǵalaýymyz boıynsha, azamattardyń 94,6% MÁMS júıesimen qamtylǵan, al halyqtyń shamamen 5,4% nemese 1 mln adam »saqtandyrylmaǵan«, - dedi Densaýlyq saqtaý mınıstri.

Beıresmı ózin-ózi jumyspen qamtyǵan halyqty ózektendirý máselesi boıynsha vedomstvo basshysy 687,7 myń adamnyń mártebesi anyqtalmaǵanyn atap ótti.

Sonymen qatar, mınıstr eńbek jáne salyq zańdarynyń oryndalýyn baqylaýdy kúsheıtý qajet ekenin eske saldy.

Selektorlyq rejimdegi keńeske óńirlerdegi ákimdikterdiń, densaýlyq saqtaý basqarmalarynyń ókilderi qatysty, olar medıtsınalyq saqtandyrýdy engizýge tehnıkalyq daıyndyq, 2020 jyldyń qańtarynan bastap medıtsınalyq kómek kórsetýdegi ózgerister jaıly halyqty habardar etý týraly baıandady.

»Medıtsınalyq saqtandyrý árbir turǵynǵa áser etedi, sondyqtan memlekettik organdar saqtandyrý medıtsınasyna birqalypty kóshý úshin barlyq qajetti sharalardy qabyldaýy tıis. Olar úılesimdi jáne ózara júıeli jumys isteýi tıis. Eń basty másele - balalardan bastap eresekterdiń barlyǵyn esepke alý qajet. Osy aıda halyq mártebesin ózektendirý, MÁMS júıesine jeńildik jasalǵan sanattar boıynsha qatysýshylardy retteý jumystaryn aıaqtaý kerek«, - dedi Berdibek Saparbaev.

Sonymen qatar, ákimdikterge 1 qazanǵa deıin medıtsınalyq uıymdardy kompıýtermen jabdyqtaý jáne ınternetpen qamtý jumystaryn aıaqtaýdy tapsyrdy.