Saparbaev kóterme-saýda ortalyǵy birinshi salynatyn oblystarǵa Jambyldy qosýdy surady
Aıta ketsek, Úkimet otyrysynda Saýda jáne ıntegratsııa mınıstri Baqyt Sultanov bıyl Almaty, Pavlodar jáne Túrkistan oblystarynda aýyl sharýashylyǵy taýarlaryn saqtaýǵa arnalǵan 5 kóterme-taratý ortalyǵyn salý kózdelip otyrǵanyn málim etken edi. Óz kezeginde Jambyl oblysynyń ákimi Berdibek Saparbaev Úkimet basshysyna ótinish bildirdi.
«Jambyl oblysy búkil Qazaqstanda pııaz, qant, tomat jáne qarbyzben qamtamasyz ete alady. Ekinshiden logıstıka jóninen biz Batys Qytaı – Batys Eýropa jolynyń boıynda turmyz. Bizdiń bir jaǵymyzda - Bishkek, ekinshi jaǵymyzda - Almaty, Shymkent pen Nur-Sultan qalalary tur. Mınıstrlikke kóterme-taratý ortalyǵy boıynsha 20 jáne 12 gektarlyq eki jer ýchaskesin usyndyq. Tolyq ınfraqurylymmen qamtamasyz etilgen. Qazirgi tańda qoımamen qamtamasyz etý deńgeıi 85 paıyz ǵana bolyp otyr. Sonyń saldarynan ósirilip jatqan ónimderdi satý bizge kúrdeli bolyp tur», - dedi Úkimet otyrysyna onlaın-rejımde qosylǵan Berdibek Saparbaev.
Aımaq basshysy osy sebepti kóterme-saýda ortalyǵy birinshi kezekte salynatyn oblystardyń qataryna Jambyl óńirin qosýdy surady.
«Saýda jáne ıntegratsııa mınıstrligine tapsyrma berseńiz birigip osy máseleni pysyqtasaq dep edik», - dedi ol.
Óz tarapynan Premer-mınıstr kóterme-saýda ortalyǵy birinshi kezekte salynatyn oblystardyń ishine Jambyl óńirin de qosý máselesi qarastyrylatynyn jetkizdi.