Saparbaev Qordaıdaǵy tártipsizdikterge qatysty ustalǵandardyń týystarymen kezdesti

TARAZ. QazAqparat – Jambyl oblysynyń ákimi Berdibek Saparbaev Qordaı aýdanyndaǵy tártipsizdikterge qatysy bar degen kúdikpen ustalǵandardyń ata-analary jáne týystarymen kezekti ret kezdesti, dep habarlaıdy QazAqparat tilshisi.

Aımaq basshysy Qarakemer jáne Sortóbe aýyldarynda jergilikti turǵyndarmen birqatar kezdesýler ótkizdi.

Berdibek Saparbaev ustalǵandardyń týystarynyń barlyq ótinishterin muqııat tyńdap, olardyń eshqaısysy nazardan tys qalmaıtynyn jáne prokýratýra, quqyq qorǵaý jáne jergilikti atqarýshy organdarmen qaralatynyn atap aıtty. Ol barlyq ózekti máseleler Qazaqstan zańnamasy aıasynda sheshilýi tıis ekendigin atap ótti.

«Biz bolǵan qaıǵyly oqıǵalar 11 adamnyń ólimine ákelip soqtyrǵanyn, eki júzge jýyq adam jaraqat alǵanyn, azamattarymyzdyń múlki zardap shekkenin umytpaýymyz kerek. Sizderdiń barlyq ótinishterińiz qaralady, ustalǵandarmen kezdesýler men telefon arqyly sóılesýler uıymdastyrylady. Quqyq qorǵaý organdary tergeý jumystaryn aıaqtady, ol materıaldarmen taraptar tanystyrylýy kerek. Zańdy buzǵan jáne olardyń kinási dáleldengen adamdardyń bári jazalanýy qajet ekenin taǵy da aıtqym keledi. Barlyǵy zań boıynsha bolýy kerek. Bul másele Memleket basshysy Qasym-Jomart Toqaevtyń jeke baqylaýynda», - dep atap ótti Saparbaev.

Sonymen qatar, oblys ákimi jergilikti turǵyndarmen bolǵan áńgime barysynda memleket tarapynan qomaqty qarajat bólinip, jergilikti atqarýshy organdar Qordaı aýdanyndaǵy eldi mekenderdi damytý baǵytynda aýqymdy jumystar atqaryp jatqandyǵyn atap ótti.

Máselen, Qarakemer jáne Masanshy aýyldaryndaǵy áleýmettik nysandardy abattandyrý men salý úshin qosymsha 3 mıllıard teńge bólingen. Turǵyn úıler, sport jáne balalar alańdary, dárigerlik ambýlatorııa, mektep, kósheler salynyp, gaz qubyry, sýmen jabdyqtaý jelileri tartylyp jatyr.

Júzdesý sońynda aımaq basshysy tártip pen zańdylyqty saqtaýǵa, túrli arandatýshylyqtar men jalǵan aqparatqa boı aldyrmaýǵa shaqyrdy.