Saparbaev Dımashtyń ata-ájesine alǵys aıtty

AQTÓBE. QazAqparat - Aqtóbe oblysynyń ákimi Berdibek Saparbaev birneshe ardagerdi Jańa jyl merekesimen quttyqtady. Ákim Dımash Qudaıbergenniń ata-ájesine erekshe yqylasyn bildirdi, dep habarlaıdy QazAqparat tilshisi.

Aqtóbe oblysynyń ákimi Berdibek Saparbaev búgin ardagerlerdiń úıine baryp, olardy Jańa jyl merekesimen quttyqtady. Aldymen aqyn Nurpeıis Baıǵanınniń balasy Momyn Baıǵanınniń shańyraǵynda boldy.

Mádenıet salasynyń ardageri 5 bala tárbıelep, áke jolyn jalǵastyrdy. Kúıshi oblys ákimimen kezdesýinde qolyna dombyra alyp, rızashylyǵyn bildirdi.

Keıin tyl ardageri, 45 jyl boıy mektepte sabaq bergen Lıdııa Smýrygınaǵa bardy.

Pedagogpen kezdesýden soń óńir basshysy Dımash Qudaıbergenniń ata-ájesi, ata-anasynyń otbasyn quttyqtady. Qudaıbergen Aıtbaev kezinde Muǵaljarda sovhoz dırektory, Embi kásiptik tehnıkalyq kolledjiniń dırektory qyzmetterin atqarǵan.

Aıta keteıik, Dımash Qudaıbergen ata-ájesiniń tárbıesinde bolyp, 5 jasynan bastap mýzykalyq mektepte bilim aldy. Óńir basshysy Berdibek Saparbaev nemeresin baýyryna basyp, úlkenge izet, kishige qurmet kórsetýdi bala kezden boıyna sińirgen Dımashty tárbıelegen Aıtbaevtar otbasyna alǵysyn bildirdi. Óńir basshysy jańa jyldyq syı tartý etti.