Saparbaev bıýdjet qarjysynyń ıgerilmeý sebebin anyqtaýdy tapsyrdy

AQTÓBE. QazAqparat - 2017 jyly Aqtóbe qalasy men Hromtaý aýdany bıýdjet qarjysyn ıgere almady. Esep boıynsha 1,4 mıllıard teńge ıgerilmedi, dep habarlaıdy QazAqparat tilshisi oblys ákimdiginiń baspasóz qyzmetine silteme jasap.

Aqtóbe ákimdiginde óńir basshysy Berdibek Saparbaevtyń qatysýymen jıyn ótti. Jıyn kezinde bıýdjettiń ıgerilýi sóz boldy. Aqtóbe oblystyq qarjy basqarmasynyń basshysy Gúlqasıma Súıintaevanyń aıtýynsha, ótken jyly jergilikti bıýdjettiń naqty túsimi 100,6 mlrd teńgeni qurady.

«Barlyq aýdan men qala bıýdjetiniń kirisi artty. 2015 jylmen salystyrǵanda ótken jyly kiris 13 mıllıard teńge ósip otyr. Al shyǵys bóligi 99,4% nemese 228,5 mlrd teńgege oryndaldy. 1,4 mlrd  teńge ıgerilmeı qaldy»,- dedi G. Súıintaeva.

Aýdandar men oblystyq bıýdjettik mekemeler qarjyny tolyq ıgergen. Tek Aqtóbe qalasy men Hromtaý aýdany josparly jumysty atqara almady.

«Biz ár apta saıyn jınalys ótkizip, bıýdjettiń ıgerilýin tarmaqtar boıynsha qarastyrdyq. Bıýdjettik baǵdarlamalardyń ákimshilerine bólingen qarjyny júz paıyz ıgerý jóninde naqty tapsyrmalar berildi. Alaıda, bul tapsyrma tolyq oryndalǵan joq»,- dedi óńir basshysy Berdibek Saparbaev.

Oblys ákimi qarjynyń ne sebepti ıgerilmeı qalǵanyn anyqtap, jaýapty qyzmetkerlerdi jazalaýdy tapsyrdy.