Saparbaev áleýmettik páterlerdiń sanyn kóbeıtýdi tapsyrdy

AQTÓBE. QazAqparat - Aqtóbede «Nurly jer» baǵdarlamasy aıasynda kottedjder men taýnhaýstar, kópqabatty úıler salynyp jatyr.Óńir basshysy Berdibek Saparbaev memlekettik baǵdarlamasmen salynyp jatqan turǵyn úılerdiń qurylysymen tanysty, dep habarlaıdy QazAqparat  tilshisi.

 «Nur Aqtóbe» yqshamaýdany 100 myń adamǵa shaqtalǵan. Munda mektep, balabaqsha, emhana sekildi áleýmettik nysandardyń bári salynady. Qazirgi kezde bul aýdanda 1200 oryndy mektep pen 320 oryndy balabaqsha jumys istep tur. Memlekettik baǵdarlamalar arqyly salynǵan kópqabatty úıler paıdalanýǵa berildi. Jańa aýdandaǵy qurylys jumystary kún ótken saıyn qarqyn alyp keledi. Máselen, bıyl «Nurly jer» baǵdarlamasy aıasynda 22 kópqabatty úı men 197 kottedjdiń qurylysy júrip jatyr. Aqtóbe oblysynyń ákimi Berdibek Saparbaev tynymsyz jumys istep jatqan qurylysshylarmen kezdesip, óz alǵysyn aıtty.

 «Qurylys qarqynyn báseńdetpeı jumysty jalǵastyra berý kerek. Biz qurylys jumystarynyń 12 aı boıy úzdiksiz júrgeni durys dep sanaımyz. Endigi tapsyrma - qysqa deıin úılerdiń  shatyryn kóterip, esik, terezelerin salý. Qysta ishki árleý jumystary júredi. Bólingen qarjyny der kezinde ıgerip, jumysty kestege sáıkes aıaqtaý tapsyrylady. Taıaýda kirpish zaýyty iske qosylady. Bul qurylys jumystary kezinde úzdiksiz jumys isteýge múmkindik beretin óndiris orny. Aqtóbege jumys saparymen kelgen Elbasy qurylys jumystaryna joǵary baǵalady. Sizderge alǵys aıtamyn»,- dedi óńir basshysy B.Saparbaev. Al jańa úıler paıdalanýǵa berilgen kezde kóshe jaryqtandyrylyp, beınebaqylaý kamerasy qoıylady.

  Aıta keteıik, «Nur Aqtóbe» yqshamaýdanynda 1 myń oryndy mektep, 320 oryndy eki balabaqsha salynady. Munda demalys alańdary da qarastyrylǵan. Jospar boıynsha bıyl qalada 96 áleýmettik páter tapsyrylady. Qurylys jumystaryna respýblıkalyq bıýdjetten 1,2 mıllıard teńge bólingen. Keler jyly 300 páter bitedi.

 «Aqtóbede páter kezeginde turǵan adamdar kóp. Áleýmettik turǵyn úıdiń sanyn kóbeıtý kerek»,- dedi Berdibek Saparbaev.