Saparbaev 101 jastaǵy keıýananyń úıine baryp, 8 naýryz merekesimen quttyqtady

TARAZ. QazAqparat – Oblys ákimi Berdibek Saparbaev ǵasyr jasaǵan Taraz qalasynyń turǵyny Aqbalyq Kelgenbaevanyń shańyraǵyna arnaıy baryp, 8 naýryz – Halyqaralyq áıelder kúni merekesimen quttyqtady, dep habarlaıdy QazAqparat tilshisi.

101 jastaǵy Aqbalyq áje eńbekke erte aralasyp, ujymsharda túrli jumystar jasap, qyzylsha ósirýmen de aınalysqan. Ol jubaıy ekeýi 7 ul-qyz tárbıelep, olardan 25 nemere, 30 shóbere súıgen. Tyl ardageri birneshe eńbek medaldarymen marapattalǵan.

«Meni arnaıy kelip quttyqtaǵanyńyz úshin kóp raqmet. Zamanymyz tynysh, elimiz aman bolsyn! Jamandyq bitken elimizden, jerimizden aýlaq bolsyn», - dep ǵasyr jasaǵan áje analyq aq batasyn berdi.

Budan soń Berdibek Saparbaev Taraz qalasynyń taǵy bir turǵyny Raısa Jandosovanyń shańyraǵynda boldy. Toqsan eki jastaǵy Raısa áje áli tyń. Ómir jolyn bala oqytýǵa arnaǵan ol qyryq jylǵa jýyq ustazdyq etken. Bir kezderi qalalyq maslıhattyń depýtaty da bolyp, qoǵamdyq ómirge belsene atsalysqan. Jubaıymen tórt ul-qyz tárbıelep ósirgen ol búginde ul-qyzynan 11 nemere, 7 shóbere súıip otyr.