Sanjar Táshkenbaı: Álem chempıonatyna qaraǵanda, Qazaqstandaǵy jarystarda utý qıyn

ASTANA. QazAqparat – Bala kezimnen Olımpıada chempıony bolýdy armandap kelemin. Bul týraly Jibek Joly telearnasyndaǵy «Jańa túngi stýdııa» baǵdarlamasynda álem chempıony Sanjar Táshkenbaı aıtty, dep habarlaıdy QazAqparat tilshisi.

«Halyqtyń qoldaýyn jaqsy sezinip otyrmyn. Barshamyz biriksek, úlken belesterdi baǵyndyramyz. Álem chempıonatyna eń myqty degender keledi. Tashkenttegi jarysta bapkerlerdiń nusqaýyn qatań ustanyp otyrdym. Bir qyzyǵy, álem chempıonaty Tashkentte emes, Qazaqstanda ótip jatqandaı boldy. Sharshy alańǵa shyqqan kezde, elimizden barǵan jankúıerlerdiń urandatqan sózderi qatty shyǵyp turdy. Sondyqtan bapkerlerdiń daýysy maǵan kóbine estilmeı jatty. Jekpe-jektiń aldynda bapkerlerdiń aıtqandaryn oryndaýǵa tyrystym. Jalpy, Qazaqstannyń qoldaýy myqty boldy», - dedi S. Táshkenbaı.

Sonymen qatar ol aldaǵy jospary jaıynda aıtyp berdi.

«Bala kezimnen Qazaqstan atynan shyǵyp, Olımpıada chempıony bolýdy armandadym. Osy maqsat oryndalyp jatsa, bapkermen aqyldasyp, kásipqoı boksqa da barý oıda bar», - dedi álem chempıony.

Onyń paıymynsha, el ishindegi irikteý jarystarynda báseke joǵary bolady.

«Álem chempıonatyna qaraǵanda, Qazaqstan ishindegi chempıonatta utý óte qıyn. Qazaqstannan chempıon bolyp shyqsań, odan keıingi jarystarda medal alý múmkindigi bolady. Sebebi el ishinde myqty qarsylastar arasynda báseke óte joǵary», - dedi S. Táshkenbaı.

Budan buryn habarlanǵandaı, 13 mamyr kúni Sanjar Táshkenbaı Tashkentte bokstan álem chempıony atandy.