Sanjar Myrzaǵalym: Tyń ıdeıalary bar jastarǵa qoldaý jasaýǵa tyrysamyz

ASTANA. QazAqparat - Osy aptada Elbasy Nursultan Nazarbaevtyń qatysýymen «Astana Hub» halyqaralyq ІT-startaptar tehnoparkiniń jumysyn resmı iske qosý sharasy ótken bolatyn. Bul óz kezeginde tehnologııalyq bıznesti damytý úshin halyqaralyq deńgeıde moıyndalǵan hab bolýy qajet. Sáıkesinshe, osy baǵyttaǵy jumystardy júzege asyrý úshin onyń alańyna otandyq bilikti mamandar jumyldyrylyp jatyr.Osy oraıda búginde jas ónertapqyshtarǵa qoldaý kórsetýmen aınalysyp júrgen «Qazaqstannyń 100 jańa esimi» jobasynyń jeńimpazy, Microsoft Kazakhstan kompanııasynyń qyzmetkeri Sanjar Myrzaǵalymnan suhbat alýdy jón kórdik.

- Sanjar, siz «Sheberhana» zerthanasynyń negizin qalaýshylardyń biri retinde tanyldyńyz. Jobanyń negizgi maqsaty qandaı?

- Bul prototıpteýdiń zamanaýı zerthanasy, onda kez kelgen startap, stýdent, mektep oqýshysy óziniń ıdeıasyn prototıp kezeńine deıin júzege asyra alady. Osydan keıin olar ıdeıany óndiriske shyǵarý qadamyna qaraı ilgerileıdi. Atap aıtqanda, biz jas startapshylardy damytý úshin servıs pen alańdy usynamyz. Bizde tıisti jumystarǵa barlyq qajetti jabdyqtar bar. Bul rette 3D - prınterler, lazerlik quraldar, frezerlik stanoktar jáne basqa da quraldar usynylady. Jas ónertapqyshtar ózderiniń ıdeıasyn iske asyryp, ony ınvestorlarǵa tanystyryp, daıyn ónimdi tutynýshyǵa usynýǵa múmkindik alady. Bizdegi alańda búginde Nazarbaev Ýnıversıteti men ózge de oqý oryndarynyń jastary jumys isteýde.

- Siz osy salada jumys istep júrgenińizge biraz ýaqyt boldy. Atalǵan jobany iske asyrǵanǵa deıin nemen aınalystyńyz?

- Biz ózimizdiń quraldarymyzdy jetildirýmen aınalystyq, ózimizdiń startaptarymyzdy qurýǵa ekpin qoıdyq. Qazirgi kezde bizde aıtarlyqtaı jetkilikti  mentorlyq qoldaý bar. Sáıkesinshe, jańa ıdeıalar qajetti deńgeıge jetýi úshin biz olardy qoldaýǵa qaýqarlymyz. Ázirge bizde barlyq sharalar aqysyz júrgiziledi. Alaıda taıaýda aqyly bolatyn arnaıy kýrstardy uıymdastyrmaqpyz. Osyǵan deıin jınaqtaǵan barlyq tájirıbemiz ózge startaptardy damytýǵa yqpal etip otyr. Elektr energııasyn únemdeýge múmkindik beretin EcoSocket tehnologııasyn ázirlegen bolatynbyz. Bul joba kóptegen adamdardyń nazaryn aýdardy, onyń ishinde Sıngapýr, Vashıngton tarapynan qyzyǵýshylyq boldy.

- Osy jobany qurýǵa qansha ýaqyt jumsadyńyzdar?

- Shyn máninde oǵan kóp ýaqyt ketti. Bizdiń komandadaǵy jigittermen oǵan stýdenttik kezimizden kiristik jáne bıznes boıynsha túsinigimiz jetkilikti bolmady. Sondyqtan da qazirgi kezde MBI-diń ekinshi kýrsynda oqyp jatyrmyz. Osy baǵytta alǵan bilim qarjy, menedjment turǵysynan damýǵa óz septigin tıgizdi. Biz «Sheberhana» jobasyn eki jylǵa tarta merzimde daıyndap, ótken jyly ǵana memleket tarapynan qoldaýǵa ıe boldyq.

- Siz «100 jańa esim» jobasyndaǵy jeńimpazdyń birisiz. Sáıkesinshe, osy jobaǵa qatysýdyń nátıjesinde qandaı ózgeristerdi baıqadyńyz?

- Bul joba PR qoldaý turǵysynda óte jaqsy kómek boldy. Osy oraıda «Shebarhana» týraly málimetter halyq arasynda keńinen tarady. Telearnadaǵy baǵdarlamadan keıin, bizge adamdar kóptep baılanysqa shyǵa bastady. «100 jańa esim» bizge óte úlken qoldaý bolǵandyqtan, sondaı-aq  biz bul jobanyń bir bóligi retinde iriktelgendikten, ózimizge júktelgen jaýapkershilikti sezinip turmyz.

Bir jyl buryn «100 jańa esim» jobasyndaǵy jeńisten keıin Prezıdent aldynda sóz sóıleý múmkindigine ıe boldym. Sol kezde ózimniń armanym týraly aıtyp óttim. Keıinnen bizge qoldaý jasalyp, endi mine «Astana Hub» alańynda zerthanamyzdy ashyp otyrmyz. Bizge memleketpen qatar, jeke ınvestorlar da kómek kórsetýde.

- Sizderdiń alańdaryńyzda jas startapshylar tarapynan tyń ıdeıalar usynylyp jatyr ma?

- Birneshe ónertapqysh ekologııa salasynda ózderiniń ıdeıalaryn iske asyrýmen aınalysyp jatyr. Budan bólek, ótken jyly bir top adam «Sheberhanaǵa» kelgen bolatyn. Qazirgi kezde olar sheteldegi úzdik ýnıversıtetterde bilim alýda jáne bizde bastaǵan jobalaryn jetildirip jatyr. Shyn máninde elimizde talantty jastar óte kóp. Ókinishke qaraı, olar ózderiniń ıdeıalary men startap jobalaryn júzege asyrý úshin qaıda barý kerektigin bile bermeıdi. Bizdiń maqsat - olardy taýyp, kómek kórsetý.

- Komandalaryńyzda kimder jumys istep jatyr?

- Bizdiń qatarymyzǵa óte myqty adamdar jınalǵanyna qýanyshtymyn. Olarmen ýnıversıtette tanystyq. Bul bilikti mamandar ortaq jobamyzdan bólek, basqa da jumystaryn qatar atqaryp jatyr. Osy qyzmetterinde  joǵary laýazymdarda jumys isteýde. Degenmen de olar bizdiń jobamyzdy júzege asyrýǵa mindetti túrde ýaqyt tabady.

Búginde óte qyzyqty jobany pysyqtap jatyrmyz. Meniń oıymsha, «Shebarhanany» Almaty men Astanada uıymdastyrǵannan keıin, basqa jobany iske asyrmaqpyz. Bul rette arnaıy jabdyqtalǵan avtobýspen óńirlerdi aralaýǵa kirisemiz. Árbir toqtaǵan qalada jergilikti startapshylarǵa kómektesip, mektepte ınnovatsııalyq prototıpteý boıynsha dáris oqımyz.

- Elimizdegi tsıfrlandyrý boıynsha qandaı pikir aıtasyz?

- Meniń oıymsha, biz óte durys qadamdardy jasap kelemiz. Endi tek osy baǵyttaǵy jumys qarqynyn údete túsý kerek.

- «Rýhanı jańǵyrý» baǵdarlamasynyń negizgi ıdeıasy nede dep oılaısyz?

- Óte durys baǵdarlama, eń bastysy, ony júzege asyrýǵa óz úlesimizdi qosý kerek. Osy oraıda «100 jańa esim» jobasyna toqtalǵym keledi. Bastapqyda «meni nege tańdady, basqa da bilikti mamandar bar ǵoı» degen oı mazalady.

Keıinnen bul bastama ár salada jas býynǵa úlgi kórsetý úshin jasalǵanyn túsindim. Árbir salanyń bilikti mamany úlgi bolyp, ózińniń kúsh-jigerińmen jastardy yntalandyrý óte mańyzdy. Osy jobaǵa qatysqannan keıin, meni mektepterge jıi shaqyrady. Onda oqýshylarǵa eki saǵattyq dáris oqımyn. Atap aıtqanda, «Rýhanı jańǵyrý» baǵdarlamasy bizdiń mádenı qundylyqtarymyzdy nasıhattaý maqsatyn kózdep turǵandyǵy unaıdy.

-      Áńgimeńizge rahmet! 

Foto: 100esim.el.kz