Santıago Kalatavra: Astananyń shapshań damýy tańǵaldyrady

ASTANA. QazAqparat - Ispan sáýletshisi Santıago Kalatrava Memleket basshysy Nursultan Nazarbaevqa Qazaqstanǵa kelip, elordanyń sáýlet nysandarymen jaqynyraq tanysýǵa múmkindik týǵyzǵany úshin alǵys aıtty, dep habarlaıdy Habar 24.

Qazaqstan Prezıdenti  kezdesý barysyda Astana biregeı sáýletimen jáne ómir súrý úshin jasalǵan qolaılylyǵymen ǵana emes, sondaı-aq qaıtalanbas atmosferasymen erekshelenetinin atap ótti.

«Elordada turǵysy keletin azamattardyń sany artyp keledi. Qala halqynyń sany bir mıllıonǵa jaqyndady. Keler jyly biz Astananyń 20 jyldyǵyn atap ótemiz», - dedi Nursultan Nazarbaev Aqordadaǵy kezdesýde.

Budan bólek Nursultan Nazarbaev áıgili ıspan sáýletshiniń eńbekterimen tanysqanyn aıtty.

«Prezıdent myrza, aldymen osynda kelgenimizge qýanyshty ekenimizdi aıtqym keledi. Astana qalasynyń tez damyp, ósip jatqanyna tańyrqaı qaraǵanymyz ras. Búgin sizdermen ózimizdiń baı, 36 jyldaı qalyptasqan tájirıbemizben bóliskimiz keledi. Máselen, bizdiń kompanııa búginde álemniń 20 memleketinde jumys isteıdi. Sonyń ishinde birneshe alyp ınfraqurylymnan turatyn jobalarymyz bar. Mysaly, Afınydaǵy olımpıadalyq nysandardy, Lıssabondaǵy EXPO kórmesiniń keshenderin aıta keter edim»,-  dedi Ispan sáýletshisi Elbasymen kezdesýinde.

Aıta keteıik, áıgili ıspan sáýletshisi jáne músinshi Santıago Kalatrava álemniń túrli elderindegi kóptegen fýtýrıstik nysannyń avtory retinde tanymal.