Sankt-Peterbýrgte EAEO elderiniń basshylary qandaı máselelerdi talqylaıdy
«Joǵary Keńestiń kún tártibi Eýrazııalyq ekonomıkalyq odaqtyń (EAEO) gaz, munaı jáne munaı ónimderiniń ortaq naryǵyn qalyptastyrý máselelerin qamtıdy. Ortaq naryqty qalyptastyrý baǵdarlamalaryn qabyldaý Qazaqstannyń osy sektorlarynyń eksporttyq áleýetin tolyq kólemde júzege asyrýǵa múmkindik beredi», - dep habarlady QR Premer-Mınıstriniń baspasóz qyzmeti.
Sonymen birge, Joǵary Keńestiń kún tártibinde EAEO aıasynda ıntegratsııalyq protsesterdi damytý týraly Deklaratsııany qabyldaý josparlanyp otyr.
«Búgin talqylanǵan jańa deklaratsııa yntymaqtastyq ornatylmaı kele jatqan keıbir salalardaǵy ózekti máselelerdi jáne kedergilerdi sheshýge baǵyttalǵan», - dedi Eýrazııalyq ekonomıkalyq komıssııa alqasynyń tóraǵasy Tıgran Sargsıan.
Onyń aıtýynsha, keıbir qatysýshy elderdiń saıasattarynyń sáıkes kelmeýi kedergilerge ákep soǵýda.
«Sondyqtan, bizdiń kelisimimiz, eń aldymen, ortaq naryqtardaǵy taýarlardyń erkin aınalymyna kedergi keltirmeý úshin saıasatymyzdy úılestirý máselesin talqylaý qajet. Bul kedendik, fıtosanıtarlyq máselelerge, qadaǵalaý men baqylaýǵa qatysty. Munda qadaǵalaýshy organdardyń da, úkimetterdiń de ustanymdaryn biriktirý qajet», - dedi ol.