Sankt-Peterbor Jeńistiń 65 jyldyǵyna oraı aýqymdy kınoforým ótkizedi

ASTANA. Sáýirdiń 12-i. QazAqparat - Uly Jeńistiń 65 jyldyǵyna arnalǵan aýqymdy kınomereke Sankt-Peterbor qalasynda, mamyr aıynyń 2-5-i aralyǵynda ótedi. Úsh kún ishinde peterborlyqtar men qala qonaqtaryna 20 eldiń 100-ge tarta fılmi, sondaı-aq 7 álemdik premera kórsetiledi.

Qalanyń vıtse-gýbernatory Alla Manılovanyń aıtýynsha, Kann kınofestıvalimen qatar kelip otyrǵan bul kınoforým Sankt-Peterbor qalasynda az bolsa da, álemdik kınoqaıratkerlerdiń basyn qosýdy josparlap otyr.

«Kınoforýmǵa Reseı kınomatograftarynyń soǵys jaıly túsirgen jarty ǵasyrlyq týyndylary, sondaı-aq sheteldik áskerı fılmderdiń eń úzdikteri irikteledi», - dedi ol.

«Kınoforýmnyń 900 kún boıy gıtlerlik qorshaýǵa tótep bergen qaharman qalada ótýiniń de mańyzdylyǵy joǵary», - dedi kınoforýmnyń prezıdenti, Reseıdiń halyq ártisi jáne stsenarısi Alekseı German.

Barlyq fılmder qala turǵyndaryna tegin kórsetiledi. Bıletter JOO, áleýmettik qorǵaý qyzmeti men mádenıet komıteti arqyly taratylady.

Kınolar jabyq alańdarmen qatar ashyq alańdar da kórsetiledi. Kınozaldarǵa Aleksandr baǵy, Saraı alańy, Óner alańy, Mıhaılov teatry, Kıno úıi jáne t.b. mádenıet oshaqtary belgilendi.

Gala-premeralar men kınooqıǵalardan basqa, kórermender men qonaqtar áskerı kıno úzindileri men áskerı taqyryptar boıynsha anımatsııany tamashalaı alady.

Kınoforým peterborlyq rejısser Alekseı Ýchıteldiń «Ólke» atty jańa týyndysymen ashylady.