Sanktsııaǵa ushyraǵan reseılik bankter 12 naýryzda SWIFT júıesinen ajyratylady

NUR-SULTAN. QazAqparat - SWIFT 12 naýryzda Eýropalyq Odaqtyń sanktsııasyna ushyraǵan reseılik bankterdi halyqaralyq tólem júıesinen ajyratatynyn rastady. Tıisti málimdeme beısenbide kompanııanyń saıtynda jarııalandy. Bul týraly QazAqparat TASS aqparat agenttigine silteme jasap habarlaıdy.

«Biz shekteýge túsken reseılik jeti zańdy tulǵany (jáne olardyń Reseıdegi belgilengen enshiles kompanııalaryn) SWIFT júıesinen ajyratamyz. EO-nyń 2022 jylǵy 2 naýryzdaǵy erejesi bizden bul kásiporyndardy 2022 jyldyń 12 naýryzynda ajyratýdy talap etýde, biz muny tıisinshe jasaımyz», - delingen habarlamada.

Buǵan deıin Eýroodaq VTB, Rossııa, «Otkrytıe», Novıkombank, Promsvıazbank, Sovkombank jáne VEB.RF sııaqty jeti reseılik bankti SWIFT halyqaralyq bankaralyq tólem júıesinen ajyratqan.

Eýrokomıssııa atap ótkendeı, Brıýssel qajet bolǵan jaǵdaıda bul tizimge jańa bankterdi qosýǵa daıyn.

SWIFT – bankaralyq tólemderdi aýdarýdyń halyqaralyq júıesi.

Ol onyń operatory bolyp tabylatyn osy attas Dúnıejúzilik bankaralyq qarjylyq telekommýnıkatsııa qoǵamynyń qurmetine atalǵan.