Sanıtarııalyq-epıdemıologııalyq organdar baqylaýynda 7,5 myńǵa jýyq mektep bar

ASTANA. QazAqparat – Densaýlyq saqtaý vıtse-mınıstri - Bas memlekettik sanıtarııalyq dárigeri Aıjan Esmaǵambetova bilim berý nysandaryn tekserý nátıjesi jaıynda aıtyp berdi, dep habarlaıdy QazAqparat tilshisi.

«Sanıtarııalyq-epıdemıologııalyq organdardyń baqylaýynda 7,5 myńǵa jýyq mektep jáne 8 myńǵa jýyq mektepke deıingi uıym bar. Balalardyń jalpy sany – shamamen 4,5 mln. Onyń ishinde 6,5 myń nysan qalalarda jáne 9 myńǵa jýyǵy aýylda ornalasqan», - dedi A. Esmaǵambetova Májiliste mektepke deıingi jáne orta bilim berý uıymdaryndaǵy qaýipsizdik júıeleri taqyrybyna arnalǵan dóńgelek ústel otyrysynda.

Osy oraıda, ol memlekettik baqylaý ári qadaǵalaý Kásipkerlik kodeksiniń normalaryna sáıkes júrgiziletinin jáne osy jylǵa deıin erekshe tártip boıynsha tekserý túrinde atqarylǵanyn aıtty. Mektepterdi tekserý jıiligi jylyna bir ret, mektepke deıingi uıymdardy tekserý jarty jylda bir ret, sondaı-aq jospardan tys tekserý tek rastalǵan zań buzý derekteri bolǵan kezde ǵana shaǵym boıynsha júrgizildi.

«2022 jyly erekshe tártip boıynsha 5 myńnan astam tekserý (onyń ishinde 5 124 tekserý – mektepterge, 123-i – mektepke deıingi uıymdarǵa) júrgizildi. Tekserý barysynda nysandardyń 92 paıyzynda tıisti talaptardy buzý derekteri anyqtaldy. Jospardan tys tártip boıynsha 5 myńnan astam nysan tekserildi. Olardyń negizgi bóligi (82%) berilgen nusqamalardyń oryndalýyna qatysty, al qalǵan 18%-ynda shaǵym boıynsha (818) tekserildi. Shaǵymda kórsetilgen derekterdiń 90 paıyzy rastaldy», - dedi vıtse-mınıstr.