Sanat Kóshkimbaev: Senim sharalary – sırııalyq kelissózdiń óte mańyzdy tusy

NUR-SULTAN. QazAqparat – Astana protsesi sırııalyq qarsylas taraptardyń bir-birine senimin arttyrady. Mundaı pikirdi elordada ótip jatqan Sırııa jónindegi Astana protsesiniń 18-kelissózi aıasynda saıasattanýshy Sanat Kóshkimbaev aıtty, dep habarlaıdy QazAqparat tilshisi.

«Sırııa máselesi boıynsha Astana protsesiniń kelissózderi – Sırııanyń ishki ahýalyn turaqtandyrý úshin mańyzdy kezeńderdiń biri. Astana protsesine bes jyldan astam ýaqyt ótkenin, janjal shıelenisin toqtatý, kóptegen tehıkalyq máseleni sheshý úshin gýmanıtarly dáliz qurý turǵysynda aıtarlyqtaı nátıjege qol jetkenin atap ótken jón. Astanadaǵy alań túptep kelgende taraptardyń bir-birine degen senimin arttyrady. Senim sharalary – sırııalyq kelissózdiń óte mańyzdy tusy», - dedi saıasattanýshy.

Onyń atap ótýinshe, Sırııa máselesine qatysty alań Jenevada qurylǵan. Osy eki alań saıası kelissóz júrgizýde bir-birin tolyqtyryp, kómektesip otyrady.

«Jaýlasýshy tarap alǵash ret kezdesip otyrǵan joq. Bul - Astana alańynyń basty jetistigi. Olar azamattyq soǵys bastalǵannan keıin 8 jyl ótken soń 2017 jyldyń qańtarynda alǵash ret ashyq túrde kelissóz ústeline otyrdy. Qazirgi ýaqytta biz naqty oń progress kórip otyrmyz», - dedi Sanat Kóshkimbaev.