Sanat Kóshkimbaev Elbasynyń jaýapkershilik jaıyndaǵy sózine oraı: Naqty eskertpe

NUR-SULTAN. QazAqparat - Qazaqstannyń strategııalyq zertteýler ınstıtýty dırektorynyń orynbasary Sanat Kóshkimbaev Elbasynyń epıdemıologııalyq usynystardy saqtaýǵa shaqyrǵan sózine oraı pikir bildirdi, dep habarlaıdy QazAqparat tilshisi.

«Bul óte naqty eskertpe boldy. Muny ózge elderdegi koronavırýs indetine baılanysty tájirıbe kórsetip otyr. Shekteý sharalarynyń barlyǵy birdeı indettiń taralýyna tosqaýyl bola almaıdy. Eń aldymen azamattardyń túısigi bolýy tıis jáne búkil álemdegi usynystardy qatań oryndaý qajet», - dedi ol QazAqparat tilshisine bergen suhbatynda.

Osy rette ol maska taǵý, áleýmettik araqashyqtyq ustaný, antıseptıkterdi paıdalaný, qoldy jıi jýý sııaqty saqtyq sharalaryn árbir adam ustanýy tıistigin atap ótti.

«Shyndyǵyna kelgende, munyń barlyǵy eń aldymen adamnyń ózine baılanysty jaıt. Máselen, adam sany óte kóp Qytaıdyń ózinde aýrýǵa shaldyqqandar sanynyń qansha paıyz bolǵanyn jáne saldary qandaı ekendigin kórip otyrmyz. Ońtústik Koreıa, Vetnam elderiniń de turǵyndary ustanymdyq tanytýdyń joǵary deńgeıin kórsetýde. Bul óte mańyzdy», - dedi ınstıtýt dırektorynyń orynbasary.

Sonymen qatar ol shekteý sharalaryn qatań ustaný búkil álemde koronavırýsqa qarsy biregeı dárilik zat bolyp otyrǵandyǵyn basa aıtty.

«Aıtalyq, Shvetsııa bastapqy kezeńniń ózinde-aq karantın sharalaryn múldem qoldanǵan emes. Biraq, bul elde adamdar barlyq qajetti saqtyq sharalaryn ózderi-aq ustandy», - dedi S.Kóshkimbaev.

Aıta keteıik, Elbasy, Qaýipsizdik Keńesiniń Tóraǵasy Nursultan Nazarbaev Premer-Mınıstr Asqar Mamınmen kezdesti.

«Qaýipti dertti juqtyryp almaý adamnyń ózine jáne tártibine baılanysty ekenin túsindirgen memleketter utylǵan joq. Keıbir elderde karantın sharalary qabyldanbady, óıtkeni adamdar saqtyq sharalaryn saqtap, mamandardyń talabyn oryndady», – degen edi Nursultan Nazarbaev kezdesý barysynda.