Sanany jańǵyrtý bizdiń maqsattarymyzdyń birligin aıshyqtaıdy - QHA
«Qazaqstan Prezıdenti N.Á.Nazarbaev «Bolashaqqa baǵdar: rýhanı jańǵyrý» atty baǵdarlamalyq maqalasynda qoǵamdyq sanany jańǵyrtýdyń naqty baǵyttaryn sıpattap berdi.
2017 jyl - Qazaqstannyń ekonomıkalyq ósýiniń jańa úlgisin jasap, bizdiń jahandyq básekege qabilettiligimizdi qamtamasyz etetin Úshinshi jańǵyrýdy iske asyrý qolǵa alynǵan jańa dáýirdiń basy boldy.
Jańa konstıtýtsııalyq reforma aýqymdy saıası jańǵyrýdyń negizin qalap, Úshinshi jańǵyrýdy iske asyrýǵa arnalǵan qoǵamdyq-saıası alǵysharttardy qalyptastyrdy.
Qoǵamdyq sanany jańǵyrtý jónindegi Memleket basshysynyń ıdeıasy búgingi tańda óte qajetti jáne oryndy ıdeıa.
Biz saıası ultty qalyptastyrý jolyndamyz. Álemde aldyńǵy qatardan tabylý úshin bizdiń árqaısymyz jáne barshamyz birigip ózimizdiń sanamyzdy, oı-órisimizdi ózgertip, eskirgen taptaýryndyqtardan arylýymyz kerek.
«Qazaqstan - 2050» Strategııasynda Qazaqstan Prezıdenti «Dástúr men mádenıet - ulttyń genetıkalyq kody» dep kórsetken. Jańa tuǵyrnamada jańǵyrýdyń basty sharty - óz mádenıetińdi, ózińniń ulttyq kodyńdy saqtaý ekeni erekshe kórsetilgen. Qoǵamnyń rýhanı jańǵyrýy ozyq dástúrler men ulttyq-mádenı negizderge arqa súıeýi kerek.
Burynǵy ınnovatsııalar búgin dástúrge aınaldy, búgingi ınnovatsııalar erteń dástúrge aınalady. Mundaı ustanym halqymyzdyń ótkenin, qazirgi kúni men bolashaǵyn jalǵaýǵa, ulttyq sananyń áralýan polıýsterin jaqyndatýǵa múmkindik beredi.
Elbasy qoǵamdy da, sondaı-aq árbir azamatty da jańǵyrtýdyń birqatar negizgi baǵyttaryn erekshe bólip kórsetip otyr.
Birinshiden, bul - básekege qabilettilik, kompıýterlik saýattylyq, shet tilderdi bilý, mádenı ashyqtyq sııaqty faktorlarǵa negizdelgen tyń jańalyqtardy álemge usyný qabileti.
Ekinshiden, bul - pragmatızm. Ol birqatar ádetter men taptaýryndyqtardan bas tartýdy da, sonymen birge ulttyń pragmatıkalyq minez-qulqy men utymdy oılaýyn, ata-babalar daǵdylarynyń tarıhı tájirıbesin de qamtıdy.
Úshinshiden, ulttyq biregeılikti saqtaý, ulttyq sana ózgergen kezde ulttyq «Men»-niń ishki máıegin saqtaý.
Búginde, barlyq jaǵymsyz nárselerge dástúr men salt-sanany qarsy qoıýǵa bolady. Sonymen birge, biz ulttyń damýyna kedergi keltiretin ótkenniń sarqynshaqtarynan arylýymyz kerek.
Tórtinshiden, bilim saltanaty - ulttyń jetistigi. Aldaǵy tehnologııalyq revolıýtsııa qazirgi jekelegen kásipterdiń joıylýyna alyp kelgen kezde, bilim - qol jetkizer tabystyń eń irgeli faktory bolmaq.
Besinshiden, tek qana evolıýtsııalyq damý bizdiń órkendeýimizge jol ashady, bul jańǵyrý ıdeologııasynyń qaǵıdaty jáne Qazaqstannyń árbir azamatynyń ishki senimi.
Altynshydan, sananyń ashyqtyǵy, aýma-tókpe zamanda qoǵamnyń jáne árbir adamnyń ózgeriske daıyn bolýy.
Bul kózqarastar qoǵamdyq sananyń jańǵyrýy úshin irgeli negiz bolady.
Memleket basshysy aldaǵy jyldarǵa arnalǵan birqatar naqty jobalardy aıqyndady.
Aldymen, bul - qazaq tilin jahandyq aqparat jáne baılanys álemine jol ashatyn latyn álipbıine kóshirý.
Álemdik ǵylym men tehnologııalardyń, gýmanıtarlyq bilimniń sońǵy jetistikterin qamtıtyn 100 jańa oqýlyq memlekettik tilge aýdarylyp, basyp shyǵarylady.
«Týǵan jer» baǵdarlamasy kásipkerlerdiń, sheneýnikterdiń, zııaly qaýym ókilderi men jastardyń ózderiniń kindik qany tamǵan jerine qamqorlyq jasap, qoldaý kórsetýine, patrıotızmdi qalyptastyrýǵa qolaıly múmkindik beredi.
«Qazaqstannyń kıeli jerleriniń geografııasy» jobasy jalpyulttyq qasıetti oryndardy jáne asa qasterli jerlerdi saqtaýǵa, sondaı-aq eldegi týrıstik ınfraqurylymdy damytýǵa múmkindik beredi.
«Jahandaǵy zamanaýı qazaqstandyq mádenıet» jobasyn iske asyrý Qazaqstandy óz shyǵarmashylyǵy arqyly dúnıejúzine tanytatyn kóptegen talanttarǵa jol ashady.
«Qazaqstandaǵy 100 jańa esim» jobasy búgingi zamandastarymyzdyń túrli salalardaǵy jetistikterin dáripteýdi qamtamasyz etedi jáne jastardy adamgershilikke tárbıeleýdiń jarqyn úlgisi bolady.
Bul tapsyrmalar memlekettiń jáne azamattyq qoǵamnyń barlyq ıdeologııalyq jumysynyń orta merzimdi perspektıvadaǵy negizi bolady.
Elbasynyń «jańǵyrýǵa degen ishki umtylys - bizdiń damýymyzdyń eń basty qaǵıdasy» degen tezısi búgingi tańda óte ózekti.
Sanany jańǵyrtý bizdiń maqsattarymyzdyń birligin, qundylyqtarymyzdyń ortaqtyǵyn jáne qoǵamdyq kelisimniń qýatyn aıshyqtaıdy.
Jańa ıdeologııalyq tuǵyrnama konstıtýtsııalyq reformany, Úshinshi jańǵyrýdyń ekonomıkalyq órkendeýin tolyqtyra túsedi jáne Qazaqstannyń HHІ ǵasyrdaǵy tabysty damýynyń dildik qozǵaýshy kúshi bolyp tabylady.
Qoǵamdyq sananyń ózgerýi synaptaı syrǵyǵan ýaqytta, jańa syn-qaterler zamanynda Qazaqstannyń damýynyń negizi bolatyn turaqtylyqty, birlikti, tatýlyqty nyǵaıtýǵa múmkindik beredi.
Biz, qazaqstandyqtardy jaýapkershilikti moıynǵa alyp, jańa ıdeologııalyq «Bolashaqqa baǵdar: rýhanı jańǵyrý» tuǵyrnamasyn iske asyrýǵa belsene qatysýǵa shaqyramyz!
Biz, halqymyzdyń shyǵarmashylyq áleýeti árdaıym asqan bıik ulttyq rýhtyń, jeńis rýhynyń, kemeldikke, álemdik órkenıetten laıyqty oryn alýǵa umtylýdyń jarqyn kórinisi bolatynyna senimdimiz!
Alǵa, Qazaqstan!», delingen úndeýde.