Sanaqqa bólingen aqshanyń jartysynan kóbi eńbekaqyǵa jumsalady – Nurbolat Aıdapkelov

NUR-SULTAN. QazAqparat – 2018-2023 jyldarǵa arnalǵan ulttyq halyq sanaǵyn qarjylandyrýdyń qajetti kólemi 9,1 mlrd teńge. Ulttyq statıstıka bıýrosynyń basshysy Nurbolat Aıdapkelov Úkimet otyrysynda osy qarajattyń qalaı jumsalyp jatqanyn baıandady, dep habarlaıdy QazAqparat tilshisi.

«Halyq sanaǵyn ótkizý kezinde búkil el boıynsha 32 313 adam ýaqytsha jumysqa ornalastyrylady. Onyń ishinde 6 myńnan astamy maýsym aıynda daıyndyq kezeńine tartylǵan. Negizgi halyq sanaǵyna 26 135 sanaq personaly jumysqa tartylady. Óńirlerde ıntervıýerlerdi jumysqa arnaıy qurylǵan komıssııa tartady. Jumysqa vaktsınatsııadan ótken azamattar alynady jáne olar jeke qorǵanysh quarldarymen jabdyqtalady», - degen bıýro basshysy sanaq jumystaryna bólingen qarajattyń qysqasha esebin berdi.

«2018-2023 jyldarǵa arnalǵan ulttyq halyq sanaǵyn qarjylandyrýdyń qajetti kólemi 9,1 mlrd teńgeni qurady. Onyń jartysynan kóbi – 4,07 mlrd teńgesi eńbekaqyǵa baǵyttalady. Qazirgi ýaqytta 3,5 mlrd teńge ıgerildi», - dedi Nurbolat Aıdapkelov.

Úkimet otyrysynda ol, shetelde júrgen qazaqstandyqtardyń sanaǵyn kim júrgizetini túsindirdi.

«Bıýro sheteldegi azamattarymyzdyń sanaǵyn ótkizýdi uıymdastyrý maqsatynda QR SІM-men ózara is-qımyl tártibi týraly birlesken buıryqtardy bekitti», - dedi Ulttyq statıstıka bıýrosynyń basshysy.