Sán-saltanat salyǵy: Quny 1 mln dollardan asqan múlikke mólsherleme ósedi

<p>ASTANA. KAZINFORM &ndash; Ulttyq ekonomıka mınıstrligi jańa Salyq kodeksiniń jobasy aıasynda sán-saltanat salyǵyn esepteýdiń tıisti mejesine qatysty túsinik berdi.</p>

Mınıstrlik málimetine qaraǵanda, qazir «sán-saltanat» zattaryna joǵary salyq salý máselesine qatysty tıisti usynystar pysyqtalyp jatyr. Bul turǵyda jıyntyq quny 450 mln teńgeden asatyn jyljymaıtyn múlik obektileri boıynsha múlik salyǵynyń mólsherlemesin kóterý qarastyrylǵan.

«Kedendik quny 75 mln teńgeden asatyn jeńil avtomobılder boıynsha kólik salyǵynyń mólsherlemesin kóterý pysyqtalyp otyr», - delingen Ulttyq ekonomıka mınıstrliginiń Kazinform agenttigine bergen jaýabynda.

Sonymen qatar, qymbat alkogol jáne temeki ónimderine, sondaı-aq qymbat teńiz kemelerine, ushý apparattaryna aktsızben qosymsha salyq salý usynysy da eskerilgen.

«Sońǵy tásilder jańa Salyq kodeksiniń jobasynda kórinis tabady», - dep atalyp ótken vedomstvo aqparatynda.

Budan buryn Qarjy vıtse-mınıstri Erjan Birjanov jańa Salyq kodeksi Parlament qaraýyna qashan engiziletinin aıtqan edi.