Sán dızaıneri men dıdjeı: Astana Opera «Kúlbıke» ertegisin jańa úlgide usynady

ASTANA. QazAqparat – «Astana Opera» teatry tanymal «Kúlbıke» ertegisin jańa úlgide usynady. Jańa balet spektaklinde basty keıipker - sán dızaıneri, al hanzada – dıdjeı keıpinde bolmaq, dep habarlaıdy QazAqparat tilshisi.

Erekshe qoıylym premerasy 8-9 qazan kúnderi ótedi. Balet horeografııasy pop-bı jáne breık-dans elementteri bar neoklassıka stılinde qurylǵan.

Ony germanııalyq horeograf Raımondo Rebek qoıǵan.

«Munda túrli nusqalar boldy. Biraq baletmeısterdiń tilegine qulaq asýdy uıǵardym. Men barlyq eksperımentterge daıyn boldym, óıtkeni men Raımondo Rebekke tolyqtaı senemin. Onyń bizge qoıǵan týyndylary óte erekshe boldy. «Kúlbıke» de - kúrdeli ári mánerli spektakl. Raımondo muny qalaı elestetetinin kórsetkende, oǵan senim artý keregin túsindim jáne bári oıdaǵydaı bolatynyna senimdi boldym. Shynynda da, ádemi kostıýmder, erekshe stenografııa shyqty, al spektakldiń ózi eshkimge jáne eshteńege uqsamaıdy. Álemde «Kúlbıkeler» óte kóp. Al bizde erekshe qyzyqty oqıǵa bar», - dedi «Astana Opera» balet trýppasynyń kórkemdik jetekshisi, Reseı halyq ártisi Altynaı Asylmuratova.

Qoıýshy-horeograf Raımondo Rebekten bólek, jańa týyndyda stsenograf Ioko Seıama, aranjırovka jasaýshy kompozıtor Devıdson Djakonello, qoıýshy-dırıjer Qazaqstannyń eńbek sińirgen qaıratkeri Abzal Muhıtdın, jaryq boıynsha sýretshi Tım Vatslavek, proektsııa boıynsha sýretshi Serdjıo Metallı, kostıým boıynsha sýretshi Fransýa-Noel Sherpın, qoıýshy-dırıjerdiń kómekshisi Rýslan Baımýrzın jumys istegen.

Premera QR Mádenıet jáne sport mınıstrliginiń qoldaýymen ótedi.

«Qandaı otbasylyq balet qoıýǵa bolatynyn uzaq ýaqyt oıladym. Bul protsess ótken jyldyń qazan aıynda bastaldy. Men oılanyp júrgende jáne álemde túrli oqıǵalar bolyp jatqanda, bárimiz bir nársege senetinimizdi kórsetetin oqıǵany qoıý kerek dep oıladym. Osylaısha, «Kúlbıkeni» tańdadyq. Bul ózine senýdiń, qandaı da bir nársege qol jetkizýdiń eń jarqyn mysaly. «Astana Opera» teatrynda da erekshe bir nárse bar dep oılaımyn. Sondyqtan balet ótken jáne qazirgi ýaqytta qoıyldy jáne ýaqyt aýysyp otyrady. Ertegiler bizge jaqsylyq pen ómirlik qundylyqtardy úıretetini belgili. Men barshaǵa tanys erteginiń jańa psıhologııalyq aspektisin kórsetkim keldi. Bizde ol ózine, ǵajaıypqa, ómir ǵajaıyptaryna sený týraly bolady. Kúlbıke – ógeı anasynyń úıinde atelesi bar sán dızaıneri. Taǵdyrdyń barlyq buralańdaryna qaramastan, ol óziniń armanyna jetýge tyrysady. Al hanzada mýzyka jasaıdy, ol eski qoǵamnyń erejeleri men zańdaryn ustanǵysy kelmeıdi, jańa nárse jasaýǵa tyrysady»,-dedi qoıýshy horeograf.

Osylaısha, Kúlbıke men hanzadanyń mýzykasy arqyly kórermen ýaqytqa saıahat jasaı alady.

Jańa qoıylymda zamanaýı ózgerister bolatynyna qaramastan, romantıkalyq ertegi qoıylymynyń dástúrleri áli de saqtalady.

Kórermen týflı formasyndaǵy sıqyrly páýeskeni kóredi, perızat er adamnyń keıpinde bolsa, Kúlbıke dóńgelengen keń kóılektiń ornyna jeńil kıim kıedi.

Sonymen birge, kópshiliktiń súıikti «Úlken valsi» - Prokofevtiń eń jarqyn valstarynyń biri oryndalady.