Samuryq respýblıkalyq-mádenı jýrnalynyń tusaýy kesildi
Ádebı-mádenı jýrnaldyń shyǵarýshysy - Qazaqstan Jazýshylar odaǵynyń Nur-Sultan qalalyq fılıaly. Respýblıka aýmaǵyna taraıtyn basylymda astanalyq aqyn-jazýshylardyń tyń týyndylary men ádebı jańalyqtar jaryq kóretin bolady. Jýrnaldyń alǵashqy sany Eýrazııa astanalary jazýshylarynyń forýmyna arnalǵan. Jańa basylymnyń alǵashqy qadamyna QR Prezıdenti Qasym-Jomart Toqaev, Nur-Sultan qalasynyń ákimi Altaı Kólginov, Qazaqstan jazýshylar odaǵynyń tóraǵasy Ulyqbek Esdáýlet lebiz arnaǵan.
«Qazaqstan Jazýshylar odaǵyna qarasty 97 jyldyq tarıhy bar «Juldyz» jýrnaly men bıyl 85 jyldyq mereıtoıyna toılap jatqan «Qazaq ádebıeti» gazeti el-jurtty avtorlarmen qaýyshtyryp kele jatqanyna bárimiz kýámiz. Jańadan tusaýy kesilgen Samuryq jýrnalyna osy ata basylymdardyń jolyn bersin dep tilek aıtqym keledi», - deıdi Qazaqstan Jazýshylar odaǵynyń tóraǵasy Ulyqbek Esdáýlet.
Jýrnaldyń bas redaktory Dáýletkereı Kápulynyń aıtýynsha, ádebı-mádenı basylym elordalyq avtorlarmen shektelip qalmaıdy.
«Samuryq alys-jaqyn shet elderdegi avtorlardyń da, elimizdegi kórnekti qalamgerlerdiń de, jas aqyn-jazýshylardyń da minberine aınalady. Jýrnal óz oqyrmandarymen maýsym saıyn, jylyna tórt ret qaýyshyp otyrady», - deıdi ol.
Eske salsaq, búgin Nur-Sultan qalasynda Eýrazııa astanalary qalamgerleriniń forýmy ótip jatyr. Osy forým aıasynda tanymal ıspan aqyny Hýnte Horhe Padronmen Abaıdyń 100 óleńin aýdarý týraly kelisimshart jasaldy.