«Samuryq-Qazynanyń» transformatsııa baǵdarlamasy belsendi júrgizilip jatyr - Ó. Shókeev
«Qorda júrgizilip jatqan jumystardy eskere otyryp, transformatsııa óte belsendi júrgizilip otyrǵandyǵyn atap ótýge bolady. Osy oraıda kompanııalardyń tıimdiligi men qunyn arttyrýymyz kerek», - dedi Ó. Shókeev.
Ol Transformatsııa baǵdarlamasy byltyrdan beri qorda júzege asyrylyp otyrǵandyǵyn aıta kele: «Eń bastysy - bul baǵyttaǵy jumystar qordyń enshiles kompanııalarynda belsendi atqarylýda. Osy jumystarǵa jumyldyrylyp otyrǵan adamdar sany artyp keledi. Buny durys dep sanaımyz, sebebi transformatsııalyq sharalardy kompanııadaǵy qyzmetkerlersiz iske asyrý múmkin emes», - dedi.
Osy oraıda ol Transformatsııa baǵdarlamasyn tabysty júzege asyrý úshin Qor kompanııalar tobynda komandalyq basqarýdan korporatıvtik basqarý tetigine kóshý mańyzdy ekenin atap ótti. Korporatıvtik basqarý Transformatsııa baǵdarlamasynyń ózegi bolyp tabylady.
Óz kezeginde QTJ basshysy Asqar Mamın Transformatsııalaý baǵdarlamasynyń «Jol kartasy» aıasynda «Qazaqstan temir joly» qyzmetindegi barlyq uıymdardyń transformatsııasy júzege asyrylyp jatqandyǵyn jetkizdi. Ol úshin toqsan bilikti mamannan quralǵan komanda jasaqtalyp, transformatsııa boıynsha keńes uıymdastyryldy jáne kompanııanyń jobalyq qurylymy qalyptastyryldy. Qazirgi kezde atalǵan keńestiń toǵyz otyrysy ótken eken.
«Qazirgi kezde biz halyqaralyq konsýltantty tartý boıynsha jumysty aıaqtaýdamyz. Aldaǵy aptada osy turǵyda tıisti shartqa qol qoıý sharalary daıar bolady», - dedi A. Mamın.
Aıta keteıik, paıdaly jumys koeffıtsentine negizdelgen tıimdilikti basqarýdyń jańa júıesi QTJ jumysyn ortaq maqsatqa jumyldyrady, ıaǵnı óndiristik tıimdilikti barynsha paıdalaný, óndiristik úderisterdi basqarý, shyǵyndardy azaıtý qamtylyp otyr.