«Samuryq-Qazynany» jańǵyrtý - búkil Qazaqstannyń ekonomıkasyn transformatsııalaýmen para-par - Ó.Shókeev

ASTANA. QazAqparat - Transformatsııa baǵdarlamasy barlyq talqylaýlardan ótti. Bul týraly búgin Astanada «Ekonomıkany transformatsııalaýda ulttyq ál-aýqat qorlarynyń róli» atty «dóńgelek ústel» aldyndaǵy brıfıngte «Samuryq-Qazyna» UÁQ» AQ basqarma tóraǵasy Ómirzaq Shókeev málim etti.

«Búgin - biz úshin óte mańyzdy kún. «Samuryq-Qazyna» holdınginiń transformatsııa baǵdarlamasy Elbasynyń deńgeıinde bekitildi jáne ony iske asyrý kezeńi bastaldy. Bul baǵdarlama jyl basynan beri ázirlendi. Barlyq talqylaýlardan ótken qujat, ıaǵnı Úkimet deńgeıinde, bizdiń dırektorlar keńesinde, enshiles kompanııalarda qaraldy»,- dedi Ó. Shókeev.

Onyń sózine qaraǵanda, baǵdarlamada negizi úsh baǵyt bar. Birinshisi - qordyń naryqtyq qunyn arttyrý, ekinshisi - «Samuryq-Qazyna» kompanııalarynyń aktıvterin qaıta qarap, úlken saraptaýdan ótkizip, eń tıimdi ǵana aktıvterdi qaldyrýǵa negizdelgen. Qalǵan aktıvterdi jekeshelendirip, jeke naryqqa shyǵarý eskerilgen.

«Úshinshi baǵytqa toqtalatyn bolsaq, bizdiń kompanııalarymyzda, qorda korporatıvtik basqarý júıeni engizýge arnalǵan. Bizdiń aktıvterimizdiń quny jalpy ishki ónimniń jartysyn quraıdy. Qazaqstanda jylyna jasalyp jatqan ınvestıtsııalardyń 25 paıyzy qordan shyǵady. Sondyqtan, qordy transformatsııalaý - búkil Qazaqstannyń ekonomıkasyn transformatsııalaýmen para-par»,- dedi Ó. Shókeev.