«Samuryq-Qazynaǵa» tıesili kompanııa basshylary jumysshy qaýipsizdigine jeke basymen jaýap beredi

ASTANA. QazAqparat – «Samuryq-Qazyna» ózine tıesili kompanııalardyń basshylaryna jumysshy qaýipsizdigi úshin jeke jaýapkershilik júktedi, dep habarlaıdy QazAqparat tilshisi.

Bul týraly «Samuryq-Qazyna» AQ qoǵamdyq keńesiniń otyrysynda qordyń basqarýshy dırektory Ǵıbrat Aýǵanov aıtty.

«2022 jyly «Samuryq-Qazyna» tobynda óndiris qaýipsizdigi boıynsha alǵashqy mamandandyrylǵan forým ótti. Jıynda qor ózine qarasty 13 iri kompanııa basshylaryna qyzmetkerlerdiń qaýipsizdigi men densaýlyǵyna jeke ózderi jaýapty ekenin eskertti. Bir jyl ishinde mundaı eńbekti qorǵaýǵa qatysty is-sharalar «Qazaqtelekom», KEGOC, QazaqGaz jáne SK Ondeu kompanııalarynda da alǵash ret ótkizildi. Onda enshiles uıymdardyń, fılıaldardyń jáne qurylymdyq bólimshelerdiń basshylary qyzmetkerlerdiń qaýipsizdigin qamtamasyz etý boıynsha mindetteme aldy», - dedi basqarýshy dırektor.

Onyń aıtýynsha, qazirdiń ózinde qyzmetkerlerdi oqytý zamanaýı halyqaralyq tájirıbege sáıkes júrgizilip jatyr.

«98 qyzmetker Ulybrıtanııadaǵy Eńbekti qorǵaý jónindegi ulttyq emtıhan keńesiniń (NEBOSH) kýrsynan ótip keldi. Brıtanııalyq qaýipsizdik jáne eńbekti qorǵaý ınstıtýtynyń (IOSH) kýrsyn 286 qyzmetker oqyp keldi. Taǵy 2430 qyzmetker uqypty júrgizý kýrsyn aıaqtady», - dedi Ǵıbrat Aýǵanov.