Samuryq-Qazynadaǵy basshylyq laýazymdardyń úshten birin áıelder atqaratyn bolady
«Genderlik teńdik» baǵdarlamasy aıasynda Qazaqstannyń túkpir-túkpirinen basqarýshylyq tájirıbesi bar «Samuryq-Qazyna» kompanııalar tobynyń qyzmetkerleri memlekettik kompanııalardyń dırektorlar keńesteri men baıqaý keńesteriniń quramyna kirý úshin menedjmenttiń qosymsha kýrstarynan ótti. Osylaısha, 71 qyz-kelinshek kýrsty aıaqtap, sertıfıkat aldy. 15 túlek ortalyq memlekettik organdar, áıelder isteri jáne otbasylyq-demografııalyq saıasat jónindegi óńirlik komıssııalar janyndaǵy saraptamalyq toptarǵa engizilgen. Taǵy 10 qatysýshy memlekettik kompanııalardyń basqarý organdaryna qabyldandy.
«Samuryq-Qazyna» AQ kompanııalar tobynyń bul oqý jobasy QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń qoldaýymen qurylǵan jáne kvazımemlekettik sektordaǵy kompanııalar men uıymdardyń basqarýshy organdarynda áıelderdiń úlesin arttyrýǵa baǵyttalǵan.
Joba QR Prezıdentiniń memleket qatysatyn kompanııalardaǵy basshylyq laýazymdardaǵy áıelderdiń 30%-dyq ókildigi týraly tapsyrmasyn iske asyrý tetikteriniń birine aınaldy.
«Ulttyq komıssııa qoǵamdyq negizde jumys isteıtin jáne belgili bir salanyń damýyna jáne qoǵamnyń ózekti máselelerin sheshýge úlken úles qosatyn óte belsendi jáne perspektıvaly áıelderden turady. Búginde Áıelder qozǵalysy jańa jarqyn ókildermen jáne kóshbasshylarmen tolyǵyp jatyr. Sizderdiń árqaısyńyzdyń qazaqstandyq qoǵamdaǵy áıelderdiń jaǵdaıyn jaqsartýǵa yqpal etetin óz ıdeıalaryńyz, bastamalaryńyz, jobalaryńyz bar ekenine senimdimin. Meniń oıymsha, áıelderdi ártúrli kompanııalardyń dırektorlar keńesine qosýdy kózdeıtin bul jobamyz biregeı», - dedi Prezıdent Ákimshiligi basshysynyń orynbasary, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraǵasy Aıda Balaeva.
«Kompanııalardy basqarýǵa baǵyttalǵan tásilderdi jetildirýdiń óte mańyzdy kezeńin aıaqtap otyrmyz. Bizde sheshim qabyldaý deńgeıinde jumys isteýge daıyn áı elder pýly bar. Bizdiń kóshbasshylardy daıarlaý tájirıbemiz búkil elge paıdaly bolatynyna senimdimin jáne biz ony bólisýge daıynbyz», - atap ótti «Samuryq-Qazyna» basqarma tóraǵasy Nurlan Jaqypov.
Qazir «Samuryq-Qazyna» tobynda 259,5 myń adam, onyń ishinde 72 myń áıel jumys isteıdi. 8,5 myńǵa jýyǵy bólim bastyǵy laýazymynan bastap basshylyq laýazymǵa deıin qyzmette. Bul – jalpy basshylar sanynyń shamamen úshten bir bóligi. Degenmen, joǵary basshylyqta (basqarmalar, dırektorlar keńesteri, baıqaý keńesterinde) áıelderdiń úlesi – tek 15%. Bul kórsetkishti 2023 jyly 20%-ǵa deıin jáne 2030 jylǵa qaraı 30%-ǵa deıin arttyrý boıynsha qadamdar qabyldanyp jatyr. Osyǵan baılanysty áıelder kóshbasshylyǵy daǵdylaryn qalyptastyrý, áıel kóshbasshylardy yntalandyrý jáne ilgeriletý, genderlik teńdik basymdyqtaryna qol jetkizý jónindegi ortany damytý úshin jaǵdaılar jasalady.