«Samuryq-Qazynada» 800-ge jýyq sheteldik azamat eńbek etedi

ASTANA. QazAqparat – «Elimizge kelip jatqan Reseı azamattary «Samuryq-Qazyna» qory jáne oǵan qarasty kompanııalarda jumys isteı ala ma?». Bul máselege qordyń qoǵammen baılanys jáne ózgeristerdi basqarý jónindegi dırektory Ǵıbrat Aýǵanov túsinik berdi, dep habarlaıdy QazAqparat tilshisi.

«Reseı azamattaryna qatysty tyıym joq. Eger azamattyń jumys isteýge ruqsaty bolsa, talapqa sáıkes kelse, tek qana «Samuryq- Qazyna» emes, basqa da kompanııada jumys isteı alady. HR Qazaqstannyń eńbek zańnamasyna saı jumys isteıdi. Reseı azamattary arasynda qabiletti kandıdat bolsa, olar bos jumys ornyna jarııalanǵan baıqaýǵa qatysa alady», - dedi Ǵıbrat Aýǵanov atalǵan vedomstvoda ótken baspasóz máslıhatynda.

Onyń aıtýynsha, búginde qorda 800-ge jýyq shetel azamaty eńbek etip jatyr.

«Samuryq-Qazyna qorynda jalpy sany 250 myńnan astam adam jumys isteıdi. Onyń ishinde 749-y – sheteldik maman. Atap aıtqanda, shetel azamattarynyń 613-i – óndiristik, al 133-i ákimshilik-basqarý personaly», - deıdi ol.

Sondaı-aq «Samuryq-Qazyna» ókili qorǵa qarasty barlyq kompanııadaǵy bos jumys oryndary «SamrukQyzmet» biryńǵaı rekrýtıng portalynda jarııalanatynyn aıtty.

«Úmitkerlerdi bastapqy irikteý protsesi avtomattandyrylǵan. Bul adamı faktor jáne sybaılas jemqorlyq qaýpiniń aldyn alady. Ár úmitkerdiń ótinishi jeke qaralady jáne barlyǵymen keri baılanys ornatylady. Portal iske qosylǵaly 20 myńnan astam bos jumys orny jarııalandy. Osy kúnge deıin 7 myńnan astam adam jumysqa turdy. Búginde «Samruk Qyzmet» portalynda 123 myńnan astam ótinish berýshi tirkeldi», - dedi Ǵ. Aýǵanov.

Foto: www.sk.kz