«Samuryq-Qazyna» Jyljymaıtyn múlik qory» jelisi boıynsha baspana alýǵa 4 myńnan asa adam qujat tapsyrdy

ASTANA. QazAqparat - «Samuryq-Qazyna» Jyljymaıtyn múlik qory» AQ jelisi boıynsha baspana alýǵa qujat qabyldaý aıaqtaldy. Turǵyn úı basqarmasynyń habarlaýynsha, eki aptanyń ishinde qabyldaý komıssııasyna kommýnaldyq turǵyn úı qorynan baspana alýǵa kezekte turǵan 4 383 adam qujat tapsyrǵan, dep habarlady elorda ákimdiginiń baspasóz qyzmetinen.

«Endi árbir qujat óńdeledi jáne ótinish berýshiniń baǵdarlamanyń sharttaryna sáıkestigi, buryn kezekke turǵan kezdegi sanatynyń bolýy tekseriledi. Sodan keıin bıyl paıdalanýǵa beriletin páterlerge ıe bolatyn úmitkerlerdiń tizimi jasalady», - deıdi Basqarmadaǵylar.

Jyl sońyna deıin memlekettik baǵdarlamanyń osy baǵyty boıynsha 678 páterdi tapsyrý kózdelgen. Páterlerdi úlestirý eki baǵyt boıynsha júrgiziledi:

- satyp alý múmkindigimen jalǵa alý (169 páter). Turǵyn úı 15 jyl merzimge beriledi. Satyp alý kezinde aı saıynǵy jalǵa alý tólemderi páterdiń jalpy qunynan shegeriledi. Baǵdarlamanyń sharttaryna sáıkes, adamdar aldymen ózderiniń tóleýge qabilettiligin tekserý kerek. Osy maqsatta «Samuryq-Qazyna» jyljymaıtyn múlik qorynyń saıtynda arnaıy kalkýlıator jumys isteıdi, onyń kómegimen azamattar arendalyq baspana úshin tóleı alatyn aı saıynǵy eń kóp tólem somasyn anyqtaı alady.

- tikeleı satý (509 páter). Turǵyn úıdiń 1 sharshy metriniń quny 180 myń teńgeni quraıdy.