«Samuryq-Qazyna» jyljymaıtyn múlik qory baspanalarynyń baǵasy jyl saıyn 4-4,5 paıyzǵa ósýde - B.Palymbetov

ASTANA. QazAqparat - «Samuryq-Qazyna» jyljymaıtyn múlik qory» AQ baspanalary baǵasy jyl saıyn 4-4,5 paıyzǵa ósedi. Bul týraly búgin Ortalyq kommýnıkatsııalar qyzmetindegi baspasóz máslıhatynda «Samuryq-Qazyna» jyljymaıtyn múlik qory» AQ basqarma tóraǵasy Bolat Palymbetov málim etti.

«Baǵdarlama (Óńirlerdi damytýdyń 2020 jylǵa deıingi baǵdarlamasy) 2012 jyldan beri jumys istep kele jatqanyn bilesizder. 2012 jyly bir sharshy metr baspananyń ózindik quny, ıaǵnı biz qurylys kompanııalarymen sharttar bekitken kezde óńirlerde bir sharshy metr úshin 120 myń teńge, al Almaty, Astana Atyraý jáne Aqtaýda - 150 myń teńge boldy. 2013-2014 jyldary óńirderde -132 myń teńge, Almaty men Astanada 164 myń teńge deńgeıinde qalyptasty. Búginde óńirlerde sharshy metr 137 myń teńge tursa, Almaty, Astana, Atyraý jáne Aqtaýda - 171 myń teńge. Jyl saıyn ósim 4-4,5 paıyz deńgeıinde bolyp otyr», - dedi B. Palymbetov.

Onyń atap ótýinshe, valıýta baǵamynyń ózgerýine baılanysty baǵalardyń kúrt ósýi boljanyp otyrǵan joq. «Baǵanyń artýyn biz anyqtamaımyz, ıaǵnı QR Ulttyq ekonomıka mınıstrligi Qurylys, turǵyn úı-kommýnaldyq sharýashylyq isteri jáne jer resýrstaryn basqarý komıtetine silteme jasaımyz», - dedi ol.