«Samuryq-Qazyna» UÁQ aktıvterin jekeshelendirý barynsha ashyq júrgiziledi
Búgin Úkimet otyrysynyń qorytyndylaryna arnalǵan Ortalyq kommýnıkatsııalar qyzmetindegi brıfıng barysynda «Samuryq-Qazyna» UÁQ» Basqarýshy dırektory-basqarma múshesi Nurlan Rahmetov osylaı málim etti.
«Jalpy, búgingi kúni Qor qurylymyna kiretin 599 kompanııanyń básekelestik ortaǵa 122-si beriledi. Alaıda, olardyń ishindegi 15 kompanııa biz buǵan deıin aıtqanymyzdaı, beıindi emes aktıvterge, 106 kompanııa beıindi aktıvterge jatady. Budan bólek, 50 kompanııa Qordyń quramyndaǵy ekinshi deńgeıli banktermen birge jekemenshik ortaǵa shyǵarylatyn bolsa, 48 kompanııa joıylady», - dedi N. Rahmetov.
Onyń aıtýynsha, 20 kompanııa qaıta qurylymdansa, 5 kompanııa memlekettik organdarǵa beriledi.
«Osylaısha, Qor aıasyndaǵy jalpy qysqartý 223 kompanııaǵa qatysty bolady nemese bul 37 paıyzdy quraıdy. 106 beıindi sıpattaǵy kompanııalarǵa kelsek, bulardyń ishinde 64-iniń aktıvi 2014 jyly jekemenshik ortaǵa ótse, sonyń ishinde 2 kompanııa qor naryǵyna shyǵarylady. 22 kompanııa 2015 jyly, 8 kompanııa 2016 jyly jekemenshelendirýge jatady. Qalǵan 12 kompanııa 2018-2020 jyldarǵa qaraı ótkiziledi dep josparlanyp otyr», - deıdi N. Rahmetov.
«Biz Úkimettik tizimge engizilgen kompanııalardy jekeshelendirýdiń ashyq ótetinine senimdimiz. Osyǵan oraı, elektrondyq alańdardy uıymdastyryp, arnaıy portal ashýdy josparlaımyz», - deıdi N. Rahmetov.