«Samuryq-Qazyna» turǵyn úı qorynyń ókilderi «Qoljetimdi baspana - 2020» baǵdarlamasyn júzege asyrýdyń josparlarymen bólisti
Aktıvterdi basqarý departamentiniń dırektory Tımýr Qaldybaev páterdi satyp alýdaǵy erejeler men talaptardy ázirleý baǵytynda tyndyrylǵan jumystarǵa toqtaldy. Kezdesý barysynda páterdi bólýge qatysý úshin ótinishti ǵalamtor arqyly tapsyrýǵa múmkindik beretin baǵdarlamanyń nusqasy nazarǵa usynyldy.
«Qazmedıa ortalyǵy» jańa kesheniniń ashylýyna oraı 2012 jyldan beri «Qazaqstan» korporatsııasynyń 200-ge jýyq qyzmetkeri ońtústik astanadan Elordaǵa at aryltty. Bizdiń keshenniń bas keńsesinde 930 adam ter tógetinin jáne olardyń arasynda da baspanaǵa zárý mamandar bar ekenin eskersek, turǵyn úı máselesiniń kókeıkestiligi arta tústi», - deıdi «Qazaqstan» RTRK AQ is basqarýshysy Janat Raıymbekov.
«Samuryq-Qazyna» turǵyn úı qorynyń baǵdarlamasy tabysy ortasha qyzmetkerlerge arnalǵan. Baspananyń quny naryqtaǵy baǵadan tómen bolmaq. Sáıkesinshe bul turmystyq jaǵdaıyn jaqsartýǵa yntaly azamattardyń qyzyǵýshylyǵyn týdyratyny haq. Páterdi satyp alý tártibi talqylaý men kelisýdiń kezeńine túsken Turǵyn úıdi satý erejelerine sáıkes anyqtalmaq. Jyljymaıtyn múlik qory júzege asyratyn «Qoljetimdi baspana - 2020» baǵdarlamasynyń ereksheligi - páter satyp alýǵa ótinish ǵalamtor arqyly qabyldanady», - dep sózin túıindedi Tımýr Qaldybaev.
Basqosýǵa qatysýshylar tarapynan ótinishti tapsyrýdan páterlerdi úlestirý kezeńine deıingi jumystar qyzyqtyrdy. Baspanany jalǵa ala otyryp ony satyp alý tetigi de tasada qalmady. Oǵan sáıkes belgilengen merzim aıaqtalysymen, turǵyn úı jalǵa alýshynyń ıeligine ótedi.
Baǵdarlamany júzege asyrýdyń alǵashqy jyly Astana, Almaty, Atyraý, Aqtaý qalalarynda jalpy turǵyn úıdiń bir sharshy metriniń quny 180 myń teńgeden aspaıdy. Al elimizdiń basqa aımaqtarynda kórsetkish 144 myń teńgeden qymbat bolmaıdy. Keıingi jyldary páterlerdi saýdalaý quny qurylys baǵasynyń ózgerýi, ınflıatsııa jáne basqa faktorlar esebinen naqtylanbaq.