«Samuryq-Qazyna» tender ótkizý merzimin eki ese qysqartty
«Eger buǵan deıin tender ótkizý ýaqyty 65 kúnge sozylsa, merzimderdi ońtaılandyrý nátıjesinde bul shara shamamen 38 kúnge qysqardy. Máselen, zakup.sk.kz jańa elektrondy satyp alý portalynda kelesi sharalardyń merzimderi qysqartyldy: satyp alýdy habarlaý, tenderlik ótinishterdi jınaý 15 kúnnen 10 kúnge deıin, ótinishterdi qaıta qaraý 10 kúnnen 5 kúnge deıin qysqardy. Kelisimshart jasasý endi 10 kúnniń ornyna 5 kúnde bitedi. Atalǵan ózgerister men tolyqtyrýlar «Samuryq-Qazyna» UÁQ» AQ taýarlar, jumystar men qyzmetterdi satyp alý erejelerine engizildi jáne aǵymdaǵy jyldyń 1 tamyzynan bastap kúshine endi» delingen habarlamada.
Negizi, bul ózgerister aǵymdaǵy jyldyń aqpan aıynan bastap «Samuryq-Qazyna» AQ Basqarma basshysy Ahmetjan Esimovtiń tapsyrmasy boıynsha engizilip jatyr. Satyp alý merzimderin qysqartý boıynsha birqatar sheshimder qabyldandy. Atap aıtqanda, biliktilik boıynsha aldyn ala irikteýden ótýdiń ýaqyt tártibi naqtylandy. Sonyń arqasynda bul sharanyń merzimi 45 kúnnen 18 kúnge deıin, ıaǵnı 2,5 ese qysqardy. Sondaı-aq, tender ótkizý sharasy eki ese qysqaryp, baǵa usynysyn suraý arqyly ótetin satyp alýlar 21 kúnnen 15 kúnge deıin ońtaılandyryldy.
Aǵymdaǵy jyldyń 21 mamyrynda ashyq tenderlerdi ótkizý sharasy tender.sk.kz portalynan jetildirilgen, ári jańǵyrtylǵan zakup.sk.kz portalyna kóshirilgen bolatyn.
Zakup.sk.kz elektrondy satyp alýlar portaly 2018 jyldyń aqpan aıynda iske qosyldy. Osy ýaqyt aralyǵynda júıege 18 myńnan astam tapsyrysty oryndaýshy tirkeldi. Jańa satyp alý alańynda 27 myńnan astam satyp alýlar ótkizildi.