«Samuryq-Qazyna» óz kompanııalaryndaǵy áleýmettik turaqtylyqqa zertteý júrgizýde

ASTANA. 21 tamyz. QazAqparat - Búgin Astanada «Samuryq-Qazyna» UÁQ» AQ basqarýshy dırektory Darhan Qaletaev pen atalǵan qor janyndaǵy Áleýmettik áriptestik ortalyǵynyń bas dırektory Nurlan Erimbetovtiń qatysýymen baspasóz máslıhaty ótti. Shara qorǵa qarasty kompanııalar tobyna júrgizilgen áleýmettik turaqtylyq reıtınginiń alǵashqy nátıjelerine arnaldy.

«El óńirleriniń shegi boıynsha barynsha turaqty ahýaldy 66,65 paıyzdyq reıtıngpen Mańǵystaý jáne Atyraý oblystarynda kompanııalar kórsetip otyr. Aıta keterligi, olar munaıshylar emes. Al eń tómengi nátıje 42-50 paıyzdyq reıtıngpen Batys Qazaqstan, Ortalyq jáne Soltústik Qazaqstan óńirlerinde tirkeldi. Tolyqtaı alǵanda, kompanııa toptary qyzmetkerleriniń basym bóligi óz ómirlerine qanaǵattanatyndyǵyn kórsetti», - dedi N. Erimbetov.

Onyń atap ótýinshe, kompanııa toptarynda jumys isteıtinderdiń basym bóligi óz quqyqtary buzylǵan jaǵdaıda sotqa jáne basqa memlekettik organdarǵa júginýge nıetti ekendikterin bildirgen. Tek respondentterdiń 3 paıyzy ǵana narazylyq aktsııasyna shyǵatyndyǵyn aıtqan.

Aıta keteıik, qazirgi tańda qyzmetkerler jany 45 myń adamdy quraıtyn qordyń 31 kompanııasynda ilki zertteý júrgizilgen.