«Samuryq-Qazyna» qorynyń satyp alý erejelerinen qazaqstandyq taýar óndirýshiler úshin jeńildikter alynyp tastalady
Bul týraly búgin qazaqstandyq qamtýdy damytý máselelerine arnalǵan Qoǵamdyq keńestiń otyrysynda «Samuryq-Qazyna» AQ basqarýshy dırektory Jumaǵalı Myńjasarov osylaı málim etti. Eske salsaq, Ulttyq ál-aýqat qory aldaǵy ýaqytta qazaqstannyń DSU-ǵa enýin eskere otyryp, satyp alýlarǵa qatysty jańa erejeler jobasyn ázirlegen bolatyn.
«Saraptama nátıjesinde biz mynadaı sheshimge keldik: DSU reglamenti DSU-ǵa basqa da qatysýshy-memleketteriniń óndirýshileri sekildi qazaqstandyq óndirýshilerge de qandaı da bir preferentsııalar usynýǵa múmkindik bermeıdi», - deıdi J.Myńjasarov. Onyń aıtýynsha, DSU talaptaryna sáıkes, satyp alý erejelerinen otandyq óndirýshilerge usynylatyn barlyq preferentsııalar joıylady.
Al jańa ereje jobasynda ishki holdıngtik kooperatsııalar múmkindigi, kásipkerlermen birlesken jańa kásiporyndar qurý máseleleri, kompanııalardyń jarǵylyq kapıtalyna ený, sondaı-aq uzaqmerzimdi kelisimder jasaý sharttary saqtalyp qalatyn bolady.