«Samuryq-Qazyna» qorynyń qaryzy qysqaryp keledi

ASTANA. QazAqparat – 2022 jyldyń qorytyndysynda «Samuryq-Qazyna» qory tobynyń qaryzy naqty mánde 9,8 trln teńge boldy. Bul týraly atalǵan qordyń ekonomıka jáne qarjy jónindegi dırektory Nazıra Nurbaeva málim etti, dep habarlaıdy QazAqparat tilshisi.

«2022 jyldyń qorytyndysynda qor tobynyń qaryzy naqty mánde 9,8 trln teńge boldy. Bul – 2021 jylǵy kórsetkishten 220 mlrd teńgege az. Jalpy, sońǵy 5 jylda qor tobynyń qaryz júktemesi azaıyp keledi», - dedi ol baspasóz máslıhatynda.

Onyń atap ótýinshe, qor toby qaryzynyń ortasha jyldyq tómendeý kórsetkishi – 7,1 paıyz.

«Qor qarjylyq turaqtylyq kórsetkishterin monıtorıngileý jáne ony álemdik jetekshi balamalardyń kórsetkishterimen salystyrý arqyly barlyq portfeldik kompanııalardyń qarjylyq turaqtylyǵyna únemi baqylaý jasap otyrady. 2022 jyly «Qazaqstan temir joly» kompanııasynyń qaryzy shveıtsarııalyq frank, rýbldegi oblıgatsııalardy jabý jáne eýro oblıgatsııalardy keri satyp alý esebinen 388 mlrd teńgege tómendegenin atap ótken oryndy. Sonymen qatar, Air Astana, «Qazaqtelekom», KEGOC, «Samuryq-Energo» kompanııalary da josparǵa saı qaryzdaryn merziminen buryn ótedi», - dedi Nazıra Nurbaeva.