«Samuryq-Qazyna» qorynyń 250-den astam kompanııasy jekeshelendiriledi

ASTANA. QazAqparat – «Samuryq-Qazyna» ulttyq ál-aýqat qorynda jekeshelendirýge jatatyn kompanııalardyń jańa tizimi jasaldy. Tizim bıylǵy tamyzda memlekettik komıssııanyń sheshimimen jáne QR Úkimetiniń qaýlysymen bekitildi, dep habarlaıdy QazAqparat tilshisi.

«Ótken jyldyń sońynda búkil kompanııany túgendeý jumysyna kiristik. ıAǵnı olar beıindi me, kompanııalardyń tıimdiligi qandaı? Sondaı-aq, shyǵynǵa batqan kompanııalarǵa qarjy quıyp qutqarǵan jón be? Álde olardy japqan nemese satqan durys pa? Bul baǵytta Úkimetpen birlesip jumys jasap, kelisip otyrdyq. Úkimet kompanııalarǵa qatysty óz krıterıılerin anyqtap, usyndy», - dedi «Samuryq-Qazyna» qorynyń damý jáne jekeshelendirý boıynsha basqarýshy dırektory Ernar Janádil elordada ótip jatqan halyqaralyq ınvestorlar aptalyǵynyń sessııasynda.

Onyń aıtýynsha, joǵaryda aıtylǵan jumys nátıjesinde jekeshelendirýge jiberiletin kompanııalardyń sany 250-den asty.

«Buǵan deıin qordyń jekeshelendirý tizimindegi kompanııalar sany 100-ge jýyq bolsa, túgendeý jumysynan keıin ony 254-ke deıin jetkize aldyq», - deıdi ol.

«Samuryq-Qazyna» qory ókiliniń málimdeýinshe, jekeshelendirý tizimindegilerdiń negizgi bóligi 20 iri ulttyq kompanııaǵa qarasty. Olardyń qatarynda «QazMunaıGaz», «Air Astana», «KEGOC», «Samuryq-Energo», «QazaqGaz» jáne «Qazaqstan temir joly» bar.

Sondaı-aq spıker atalǵan kompanııalardy 2025 jylǵa deıin IPO-ǵa shyǵarý jospary baryn aıtty.