«Samuryq-Qazyna» qorynyń 10 trıllıon teńge qaryzy bar - Almasadam Sátqalıev

NUR-SULTAN. QazAqparat – «Samuryq-Qazyna» ulttyq ál-aýqat qorynyń qansha qaryzy bary belgili boldy, dep habarlaıdy QazAqparat tilshisi.

«Qazir qordyń jalpy qaryzy – shamamen 10 trıllıon teńge. Qaryzdyń aýqymdy úlesi «QazMunaıGaz» jáne «Qazaqstan temir joly» kompanııasyna tıesili. Qordyń odan basqa da boryshtary bar.

«QazMunaıGaz» kompanııasyna keletin bolsaq, qarjy tıimdi jobalarǵa tartyldy. Munaı baǵasy aıtarlyqtaı joǵary, sondyqtan qaryzdy qaıtarý boıynsha eshqandaı kúmán joq. Jobalar ózin-ózi aqtaıdy.

Qordyń óz qaryzyna kelsek, qarjy «Qashaǵan» úlesin satyp alýǵa tartyldy. Bul úles «QazMunaıGaz» ulttyq kompanııasynyń bazasy men IPO-ǵa shyǵý múmkindigin ulǵaıtady», - dedi Almasadam Sátqalıev Ortalyq kommýnıkatsııalar qyzmeti alańynda ótken baspasóz máslıhatynda.

Sondaı-aq, qor basshysy «Qazaqstan temir joly» kompanııasynyń qaryzyna qatysty túsinik berdi.

«Qazaqstan temir joly» kompanııasynyń oblıgatsııalaryn satyp aldyq. QTJ jelisi boıynsha tranzıt aıasy keńeıip jatyr. QTJ qyzmetiniń Qytaı, Eýropa boıynsha ulǵaıýyn eskersek, kompanııa óz qaryzyn tolyq kólemde óteı alady dep esepteımiz», - deıdi ol.

Buǵan deıin «Samuryq-Qazyna» UÁQ basshysy elimizde atom elektr stantsııasyn salý jobasy aıasyndaǵy jumys bastalǵany týraly aıtty.

Foto: ortcom.kz