«Samuryq-Qazyna» qoryna qarasty kompanııalardyń memlekettik satyp alý kólemi Almatydan 11 aıda 738 mlrd. teńgeni qurady - Ó. Shókeev

ALMATY. 19 jeltoqsan. QazAqparat - Almaty qalasy qazirgi tańda «Samuryq-Qazyna» ulttyq ál-aýqat qory» AQ-na qarasty kompanııalardyń taýar men qyzmet túrlerin memlekettik satyp alý boıynsha arnaıy basqosý ótkizetin elimizdegi jalǵyz aımaq bolyp otyr. Bul týraly qordyń basqarma tóraǵasy Ómirzaq Shókeev búgin Almatyda ótip jatqan «Memlekettik satyp alý - 2014» jıynynda aıtty.

«Bıyl biz besinshi jyl qatarynan Ahmetjan Smaǵululynyń jetekshiligimen bul sharany ótkizip otyrmyz. Almaty mundaı shara ótetin elimizdegi jalǵyz aımaq. Bul biz úshin óte tıimdi jáne paıdaly bolyp otyr. Munda biz satyp alý salasyndaǵy ózekti máselelerdi talqylaımyz. Máselen 2011 jyly qorǵa qarasty kompanııalardyń satyp alý kólemi Almaty boıynsha 535 mlrd. teńge bolsa, 2012 jyly bul san 73 paıyzǵa ósip, 730 mlrd. teńgeni qurady. Al bıylǵy jyldyń 11 aıynda bul 738 mlrd. teńgeni qurap otyr», - dedi Ó.Shókeev. Onyń aıtýynsha, byltyr qysqa merzimde elektrondyq satyp alýdyń aqparattyq júıesi iske qosylǵan bolatyn. Sonyń nátıjesinde satyp alý shyǵynyn josparlanǵan kólemnen 15 paıyzǵa únemdeýge qol jetkizildi. Endi satyp alý tártibine ózgerister engizilgeli otyr. Álemdik tájirıbesi boıynsha jetkizýshilerdi kásibı tańdaý júıesi engizilip, halyqaralyq kompanııalardyń standarttary boıynsha júzege asyrylatyn bolady.