«Samuryq-Qazyna» qory tender ótkizýdi elektrondyq júıege aýystyrady

ASTANA. 19 naýryz. QazAqparat - «Samuryq-Qazyna» qory jyl ortasyna qaraı tenderlerdi elektrondyq júıemen ótkize bastaıdy. Búgin «Samuryq-Qazyna» AQ men «Atameken odaǵy» ulttyq ekonomıkalyq palatasy ókilderiniń qatysýymen qazaqstandyq qamtýdy damytý máselelerine arnalǵan Qoǵamdyq keńestiń otyrysynda «Samuryq-Qazyna» AQ basqarýshy dırektory Jumaǵalı Myńjasarov osylaı málim etti.

«Búgin biz kásipkerlerdi elektrondyq satyp alý erejelerimen tanystyratyn bolamyz. Bundaı satyp alýǵa «Samuryq-Qazyna» qory kóshe bastaǵan bolatyn. Budan bólek, búgin biz jańa óndiristerdi ashýǵa baılanysty jańa qoldaýlardyń tetigi týraly aıtatyn bolamyz. Bundaı qoldaýlardy qor óz tarapynan uıymdastyryp, oǵan óndiris jumystary boıynsha kásipkerlerdi barynsha tartpaqshy», - deıdi J. Myńjasarov.

Onyń aıtýynsha, qoldaý baǵytynda negizinen birlesken kásiporyndar qurý múmkindikteri, holdıngtiń jańa kásiporyndardyń jarǵylyq kapıtalyna ený múmkindikteri, sondaı-aq óndiriletin ónimderge uzaqmerzimdi tapsyrystar túrinde kórinis tappaqshy.

«Al jalpy elektrondyq satyp alýlarǵa aqpan aıynan kóshýdi bastadyq. Bul biz úshin úlken jańalyq. Ótken aıdan satyp alýdaǵy baǵalyq usynystar tásili elektrondyq júıege engizilip otyr. Al jyldyń ortasyna taman elektrondyq júıemen tender ótkizýdi de qolǵa ala bastaımyz», - deıdi basqarýshy dırektor. Onyń sózine qaraǵanda, elektrondyq júıege kóshý qazaqstandyq qamtýǵa áser etpeıdi. Degenmen, mundaǵy basty nátıje transparenttilik pen sapada bolyp otyr.