«Samuryq-Qazyna» qory «QazMunaıGazdyń» janar-jaǵarmaı quıý stansalarynyń qurylysyn toqtata turmaq

ASTANA. QazAqparat - «Samuryq-Qazyna» qory qarjy únemdeý baǵytynda «QazMunaıGaz» kompanııasynyń janar-jaǵarmaı quıý stansalarynyń qurylysyn ýaqytsha toqtatady. Búgin Ortalyq kommýnıkatsııalar qyzmetindegi baspasóz máslıhatynda atalǵan qordyń bıznesti damytý jónindegi bas dırektory Berik Beısenǵalıev osylaı málim etti.

«Qarjyny únemdeý baǵytynda eleýli jumys atqarylyp, bizdiń barsha enshiles bólimshelerdiń damý josparlary qaıta qarastyryldy. Sonyń ishinde ınvestıtsııalyq baǵdarlama boıynsha keıbir jobalar ýaqytsha toqtatylady nemese belgili bir merzimge keıinge shegeriledi. Olar júzege asyrýdyń belsendi kezeńinde emes. Mysaly, «QazMunaıGaz» boıynsha janar-jaǵarmaı quıý stansalary jelisiniń qurylysyn keıinge qaldyrýdy sheshtik. Sebebi, bul jobany toqtata turýǵa bolady. Bundaı jobalardyń quny shamamen 235 mlrd. teńgege (barlyq kompanııalar toby boıynsha) jetip otyr», - dedi ol. Sonymen qatar B. Beısenǵalıev Indýstrııalyq-ınnovatsııalyq damý memlekettik baǵdarlamasyna, «Nurly jol baǵdarlamasyna engizilgen nemese «EKSPO-2017» aıasyndaǵy jobalardy júzege asyrý toqtatylmaıtyndyǵyn qadap aıtty.