«Samuryq-Qazyna» qory «Eır Qazaqstan» áýe kompanııasy aktsııalarynyń jartysyn ıemdenedi - QR KKM

ASTANA. QazAqparat - «Samuryq-Qazyna» qory «Eır Qazaqstan» áýe kompanııasy aktsııalarynyń jartysyn ıemdenedi. Bul týraly «QazAqparat» HAA-nyń resmı saýaldaryna jaýap berý kezinde QR Kólik jáne kommýnıkatsııa mınıstrliginen habarlandy.

Mınıstrliktiń málimetinshe, búginde Qazaqstannyń ishki naryǵyndaǵy áýe tasymaldarynyń baǵdarlary artyp keledi. Jyl saıyn elimiz boıynsha ishki baǵdarlarda apta ishindegi tasymal jıiligi 20 paıyzǵa artýda. Alaıda, qazirgi kezde ishki tasymaldyń áleýeti tolyq iske qosylmaı otyr.

«Óńirlik avıatsııalyq tasymaldarda halyqtyń qajettiligin qanaǵattandyrý maqsatynda Memleket basshysy «Samuryq-Qazyna» qoryna óńirlik áýe kompanııasyn qurýdy tapsyrǵan bolatyn. Bul joba aıasynda Qordyń seriktesi retinde «Eır Qazaqstan» avıatsııalyq kompanııasy» AQ belgilendi. Qor basqarmasy «Eır Qazaqstannyń» 49 paıyz qarapaıym aktsııalaryn alý týraly sheshim qabyldady», delingen habarlamada.

Qazirgi kezde osy kompanııany áýe tasymaldaýshy retinde qurý boıynsha tıisti sharalar júzege asyrylýda. Qordyń tapsyrysy aıasynda óńirlik áýe kompanııasyn qurýdyń bıznes-jospary ázirlendi.

Sonymen qatar «Samuryq-Qazyna» seriktestesimen birge áýe kemelerin qarjylandyrý boıynsha iri lızıngtik kompanııalarmen kelissózder júrgizýde. Osy oraıda 2015 jyldyń birinshi jartysynda 6 ushaqty, sondaı-aq 2015 jyldyń sońyna deıin taǵy 4 áýe kemesin jetkizý josparlanyp otyr. Bul ushaqtar Qazaqstanǵa jetkizilgennen keıin áýe kompanııasy baǵdarlar boıynsha alǵashqy tasymaldaýdy bastaıdy.

Bul turǵyda mınıstrlik atalǵan áýe kompanııasynyń ishki naryqta sátti jumys istep ketýine tıisti qoldaý sharalaryn jasaýǵa daıyn ekenin atap ótti.